E 1614 e voe savet iliz Malvegon (« Maomusson » e gallaoueg, Maumusson e galleg) e Bro Ankiniz. Met emañ o kinnig kouezhañ en he foull abaoe bloavezhioù bremañ. Sintroù a zo bet lakaet e pep lec’h e-barzh evit souten ar mogerioù arruet kozh. Dañjerus eo degemer fideled enni ha pa ez eus overennoù ur wech bep miz. A-wechoù e chom ar fideled er-maez ! Fellout a ra d’ar maer reneveziñ anezhi da vat, kuit ma kouezfe un tamm maen war unan bennak met n’hall ket nag an ti-kêr nag an eskopti paeañ al labourioù. Se zo kaoz ez eus bet savet ur gevredigezh evit saveteiñ an iliz. 2500 ezel o deus emezellet ha 1100 anneziad er gumun !
E miz kerzu 2022 ez eus bet lañset un c’houlzad a zastum arc’hant gant ar gevredigezh. 120 000€ a zo bet rastellaet gant se. Chom a ra 30 000€ evit klozañ an afer. Met etretant eo bet dalc’het an iliz gant ar Fondation du Patrimoine evit bezañ war roll ar 100 savadur relijiel a zo da saveteiñ a-raok pep tra. Pezh a dalv e vo roet arc’hant ouzhpenn d’an ti-kêr ! Hag ezhomm zo rak istimet eo bet al labourioù : ur milion evit lakaet an traoù en o reizh. Feiz !
A-raok pell e krogo al labourioù kentañ hag a gousto 542 000€. An hanter all a-c’houdevezh, ma plij d’an aotrou Doue ha d’an dud brokus !
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
