Setu ur seurt istor priñsez an amzer-vremañ : An itron X a oa o labourat e gref lez-varn Sant-Nazer. Ur plac’h en he 40 vloaz e oa, da lavaret eo ne oa ket ur plac’h e bleuñv he yaouankiz, un tamm penn-skañv. Nann avat ! Siwazh dezhi, ma ne oa ket ur penn-skañv e oa ur gwir penn-dramm. Kemer a rae drogach (kokain ha kannab) par ma c’helle nes komz eus ar boeson (ul litrad gwin bemdez !) hag al louzoù !
Setu penaos he doa graet anaoudegezh gant « Tony ». He dealer e oa. Met un dealer « moutig ». Tremen a rae p’en doa c’hoant. A-wezhioù gant mignoned dezhañ. Met ne oa ket strikt. Karantez e oa outañ. Ha c’hoant ganti prouiñ e oa piket he c’halon ! E penn kentañ e lavaras dezhañ e oa tud gant ar memes anv ha eñ « dindan evezh ar justis ». Just se. Met n’eo ket sot ar paotr, komprenet en doa buan deus petra oa kaoz amañ. Ha komprenet en doa ivez e c’helle profitañ eus he mignonez nevez. Na brokus e oa hi ! Ha sot. Rak, tamm-ha-tamm e roas muioc’h-mui a zokumanchoù ha titouroù dezhañ, diwar-benn an aferioù ma oa ar justis o klask penn anezhañ e-barzh. Da skouer : Fellout a rae d’ar polis serriñ « Tony » met hennezh a oare an deiziad rezis en a-raok…
Evel just, un deiz e voe komprenet gant ar boliserien e oa ur « c’hoz » en ti : serret e oa bet « Tony » o vleiniañ karr-tan ar grefierez, gantañ alc’hwezioù he ranndi zoken ! Serret e voe an itron X d’he zro ha kaset d’ar prizon. Amañ e komprenas e oa Tony o tremen lost al leue dre he genoù ! Hi a oa sot gantañ met eñ ne oa ket. Forzh penaos n’he doa ket e niverenn bellgomz dezhañ. Bewezh ma felle dezhi kas ur gemenadenn dezhañ e ranke tremen dre ur « vignonez » hag a gase an traoù da Dony. Met Tony a c’helle tremen da welet anezhi d’ar ranndi m’en doa c’hoant. Ha leuskel aferioù ivez.
D’an 19 juin 2023 e voe graet ur furchadeg en he ranndi ha kavet tout ar prouennoù. Mui ar pakadoù dramm kuzhet gant Tony er c’harrdi.
Etre ar 15 hag an 19 a viz gwengolo e vo prosez an afer dirak lez-varn Anjev. Gallout a rafe ar paourkaezh plac’h bezañ kondaonet da 7 bloavezh toull-bac’h d’ar muiañ tout. Hi a zo fontet gant ar vezh bremañ.
Ha Tony a gaso orañjezennoù dezhi en toull-bac’h ma tremen fall an traoù ?
[cc] Breizh-info.com, 2025, dépêches libres de copie et de diffusion sous réserve de mention et de lien vers la source d’origine
