Rezon o deus bet tud Gwened hag Arvor Baden da stourm aveit ma ne drohe ket Berder da baradoz aveit ar binarded a Baris pe me ouia ! Kar un enezenn vrav-kenañ eo Berder. Aveit monet di ho alian da barkiñ an oto ‘b’ar bourk ha, da c’houde, da vonet get « hent ar mor » hag a ya betak ar chaoser. 80m a hirder eo hi mes pa vez lanv n’haller ket tremen, un enezenn eo daet Berder da vout. Dav eo gortoz an dichal aveit monet di. B’an tu-mañ ag ar chaoser eh eus ur pannel get an euriadoù, peotramoù àr internet.
Ur wezh arruet ‘ba Berder, dav eo mont get an hent a ya war-raok. Prevez eo kreiz an enezenn kar ur gêriadenn vakañsoù eo. Faotañ a rae d’an embregerezh Giboire a Roazhon a sevel ul leti luks aveit ar binarded a Baris. Ur pec’hed ! Gras da Zoue ne vo ket ag ar sotoni-mañ ha chom a ray Berder st’èl m’emañ.
Nepell ag ar chaoser eh eus ur bered bagoù. N’eo ket hini An Oriant, sur mes brav eo memestra. Ha fromus eo da welet restadoù bagoù astennet àr un draezhenn vihan èl-sen.
Aveit ar re dik get koed mor, amañ eh eus brankennoù !
Un tamm pelloc’h emañ chapel Santez-Ana. Ur gaer a chapelig mod gotek eo. Brav ! Mes allas, n’haller ket mont a-barzh. Div daol-vaen a zo ivez nepell ac’hann, unan a zo anvet « Er Roch » èl rezon !
Mes ar pezh a sach evezh ar vizitour àr Berder eo ar gwez. Gwez-sapin, gwez-derv. Unan, ur pikol hini, a zo 250 vlez ! Simbol an enezenn eo ha n’haller ket tremen e-biou dezhi hep dougen bri dezhi. ken meurdezus eo.
Mes n’eo ket an hini nemeti a sort-se. Hed-ha-hed d’an hent eh eus gwez all st’èl-se. Pezh mell gwez, o brankennoù é rodellat, ur bam !
Du-mañ ha du-hont en enezenn e weler tourioù, kroezioù, puñsoù pe feutanioù oeit da hesk ivez. Hag oufigoù bihan, get traezhennoù ken bihan arall, aveit rouziñ pa vez brav an amzer.
‘ba su an enezenn e c’heller gwelet red ar gazeg. An eil kreñvañ ag Europa eo ! Ha gwir eo emañ souezhus-eston é welet barradoù mor é vonet àr-raok èl-sen. Santet a reer nerzh ar mor, nerzh an Natur diragomp-ni paourkaezh tud bresk.
Setu. Un euriad a zo afer aveit gober tro an enezenn. Taolit evezh doc’h eurioù ar morad, etre ar lañv hag an tre, aveit tremen.
Na kaer eo Breizh aveit chomel a-zirak ar skrammoù, ‘gav ket deoc’h ?
Illustration : DR
[cc] Article relu et corrigé (orthographe, syntaxe) par ChatGPT.
Breizh-info.com, 2025, dépêches libres de copie et de diffusion sous réserve de mention et de lien vers la source d’origine
