Skipailh mell-droad Konk-Kerne en deus gouniet e blas ‘ba ligue 2 ar blez-mañ za. Ya met e peseurt stad e vo c’hoariet ar matchoù ‘b’ar gêr ? Hervez reolennaoueg ar « Ligue » e tle ur skipailh kaout ur stad get normoù surentez rezis, un dribunell aveit ar gazetennourion, plasoù miret aveit suportourion ar skipailhoù all, … Hag allas n’eo ket stad Guy-Piriou bras a-walc’h evit se, labourioù a vo groeit met ne vint ket achu a-raok an hañv 2024. Da c’hortoz eo dav d’an « dounetaerion » kaout ur stad aveit ar c’houlz-amzer 2023-2024.
Goude bout komañset da varc’hata get Gwengamp en deus melestradur ar c’hlub bet e darempred get ti-kêr an Oriant, perc’henn àr stad ar Voustoer. Reve Frañs Glas Breizh Izel, e vehe mat da Fabris Loher, anezhañ maer An Oriant, e vehe c’hoariet ‘ba an Oriant an hanter ag e vatchoù gant skipailh Konk. Ar pezh zo ne venn ket d’ar maer e vehe groeit matchoù e miz eost kar Gouel ar Gelted a zo hag eo dav d’ar letonenn diskuizhiñ goude pazioù ha dañsoù ar sonerion.
Setu dirouestlaet an hanter ag an diskoulm aveit Jacques Piriou anezhañ prezidant an US Konk-Kerne neuzen.
Hag e-men e vo c’hoariet ar matchoù ? Ne vo ket ‘ba Gwengamp moarvat kar re ziaes e vo an traoù o c’houzout e vo an daou glub ‘b’ar memes kampionad. Chom a ra Brest peotramant Gwened hag a c’hellahe degemer paotred an ton…
A-benn ar 15 a viz even e ranko bout dirouestlet ar problem. Mod pe vod !
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
