Piv eo ar plac’h yaouank-mañ ? Seurt Marion ar Faoued an amzer-vremañ pe laerez dizamant ? Laerez dizamant o deus lavaret barnerien lez-varn Naoned d’an 18 a viz ebrel. Kondaonet eo bet ar plac’h a 19 vloaz a oa e penn ur vandennad a gañfarded a laere el letioù da 6 mizvezh toull-bac’h mui daouzek mizvezh gant goursez.
E-pad mizioù he deus graet he reuz etre Naoned ha Sant-Nazer e 32 leti. Diduellañ a rae ar gendouezourion tra ma zae tre he skipailh er c’hambroù ha laerañ kement tra a gavent. Ha dre ma oant poseded gant an diaoul o doa bazailhet un den, war enez Santez-Ana (bremañ « Enez Naoned »), e Naoned rak n’en doa ket sigaretennoù da reiñ dezho.
Steutaet o doa war tapisoù ul leti, lakaet o doa spoum aoteniñ war melezour unan all, met tout se zo dister e-keñver tout al laeroñsioù o doa graet. A-benn ar fin int bet tapet dre sellet ouzh ar c’hameraioù video.
Ur vuhez truek he deus bet ar plac’hig met n’eo ket trawalc’h evit bezañ didamallet. Hag hi da genderc’hel da nac’hañ dirak al lez-varn ha pa oa bet diskouezet dezhi ur foto anezhi tennet eus ar video-eveshaerezh !
Heuliet gant desaverien, hounezh a labour bremañ gant… tud kozh eus Bro Sant-Nazer. Evit ur bennozh doue evel just, alese he deus aon ar varnerez e vefe « temptet » da laerañ ur vamm-gozh bennak…
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
