Klask a ra ar gouarnamant Bayrou lemel daou zeiz gouel evit « dont a-benn eus an divigad ». 9 deiz gouel a zo e Bro-C’hall, al lodenn vrasañ anezho a zo deizioù gouel eus an deiziataer relijiel katolik. Ma’z a ar gouarnamant Bayrou betek penn e vo lemet deizioù sakr gant ur gouarnamant demokrat-kristen ha n’eo ket gant ur gouarnamant eus an tu-kleiz frañmasoñ. Diaoul biskoazh !
Met n’eo ket sur e vo ken aes an afer e teir rannvro : Elzas, Mozel ha Saint-Pierre et Miquelon. En Elzas ha Mozel, abalamour d’un istor kompliket, ez eus daou zeiz gouel ouzhpenn : Gwener ar Groaz hag ar Sant-Sten. Memestra e Saint-Pierre et Miquelon met diwar abegoù disheñvel.
Pa oa bet embannet gant François Bayrou e felle dezhañ lemel daou zeiz gouel e savas trouz tud Alzas Mozel. Int a zo dam-emren gant ur gwir lec’hel hag a zalc’hont yud dezhañ. Hag e-barzh ar gwir-mañ ez eus an daou zeiz gouel ouzhpenn. Arabat disoñjal n’eo ket bet aboliset al liamm etre ar Stad hag an Ilizoù en Elzas-Mozel kennebeut. Skrivet eo bet gant maer Colmar Eric Straumann da François Bayrou e oa an daou zeiz-se « ul lodenn eus hon identelezh » memes.
D’al lun 11 a viz eost e lakaas ar gouarnamant da c’houzout ne oa ket e-barzh da cheñch an disterañ virgulenn d’ar « gwir lec’hel ». Hag an deiz zeiz gouel zo ‘barzh.
Ur sturfolenn a zo bet roet d’ar sindikadoù ha d’ar gevelerien sokial hag a dalvo da ziazez labour evit ar « reformoù ». Enni emañ skrivet ne vo ket aboliset an daou zevezh en tri ziriad.
Met petra a vo lavaret gant tud LFI hag a reklem gant kri forzh e vefe lamet ar gwir lec’hel en Elzas-Mozel ha lakaet da dalvezout lezenn 1905 ?
Crédit photo : DR (photo d’illustration)
[cc] Breizh-info.com, 2025, dépêches libres de copie et de diffusion sous réserve de mention et de lien vers la source d’origine
