Setu, dre forzh bezañ aloubet gant ar barizianed, kêr Gwened zo deuet da vezañ re-bar d’un arondisamant eus Pariz ! Poubelennoù e pep lec’h, straedoù flaerius, razhed du o kantreal, … diskroget o deus paotred an teil eus ar GMVA (an tolpad kêrioù) diouzh al labour. Muioc’h a arc’hant a reklemont ha gwir eo n’eo ket paeet mat ar vicher a zideiler : a-boan 1 800€ rik goude 20 vloaz a-dreñv ar c’harr-samm ! Forzh penaos emañ kentoc’h a-du tud Gwened gant ar c’hrevisted. Arruet e oa poent d’an tolpad kêrioù uhelaat o goproù.
Met ne fell ket da zDavid Robo, anezhañ maer Gwened ha prezidant ar GMVA, plegañ. Ha brezel etre an ti-kêr hag ar sindikadoù. E-keit-se e weler muioc’h-muiañ a boubelennoù berniet an eil war eben e kreiz-kêr. Hag an amzer o tommañ hag an douristed o tont muioc’h-mui ! Ur skeudenn vrav eus Gwened, neketa ?
War Facebook Gwenediz zo o deus lañset ur bajenn evit kas ar bernioù seier propsac uhelañ. Kement ha oberennoù hag a vefe priziet mat e bed an arzoù a-vremañ emichañs !
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
