« Kerkiger », ur gigerezh nevez hag un tamm ispisial e Redon

Ur gigerezh ma vo gwerzhet enni gouennoù eus ar vro nemetken ! E Redon, just e-kichen ar skol Itron-Varia ha dirak al lenn-borzh, ez eus bet digoret nevez zo ur stal ma c’hello ar pratikoù kavout kigoù eus gouennoù Breizh : buoc’h Naoned, arvorigenn, buoc’h velen Bro-Leon, brizh-du, jerze, normandenn, moc’h gwenn ar c’hornôg, moc’h du gaskon, yac’h koukou eus Roazhon, kig-oan lannoù Breizh… gouennoù kozh ha lec’hel nemetken ! « Kerkiger » eo anv ar gigerezh-mañ (ur fazi a zo siwazh) ha digoret eo bet d’an 13 a viz genver.

Mont a ra ar boser war an dachenn, e pep lec’h e Breizh, e Normandi pe e Gaskogna, da gejañ ouzh ar broduerien ha da choaz ar c’higoù gwellañ.

Eus Severeg eo Romuald Martin, an hini en deus savet Kerkiger. Bet pomper Paris e-pad 10 vloaz, en doa c’hoant da cheñch micher goude bezañ bet plomer ha tredaner e pep lec’h e Breizh da c’houde.

E Naoned, er gigerezh Les Bottes, en deus desket e vicher ha diplomet eo bet e miz even. Arruet e oa poent evitañ da zigeriñ e stal en e vro orin : Bro Redon. Evit hor brasañ plijadur !

Foto : Kerkiger

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.