Goude kêr Felger m’eo bet adsavet war internet evel ma oa e 1895, setu bourk Begnen, parrez kreiz ar Morbihan, a zo o vezañ adsavet e stumm ur vaketenn. Ha n’eo ket Begnen a-vremañ a zo o vezañ graet e bihan, Begnen en XIXvet kantved ne lavaran ket.
Louis Morio an hini eo, anezhañ maer kozh Begnen ha bet renour ar skol brevez, en deus boulc’het al labour ramzel-se.
E penn kentañ e felle dezhañ adsevel ur c’haou nemetken met a-benn ar fin e tivizas mont pelloc’h : adsevel ar bourk evel ma oa en XIXvet kantved diwar planioù ar c’hadastr Napoleon eus 1827.
Gwelet a reer ar vered tro-dro d’an iliz, chapelig ar “c’hongreg'”, ar presbital kozh, an atantoù ha tud ar vro graet gant plastr.
Dre sellet pizh ouzh ar c’hadastr kozh e kompren tamm-ha-tamm Louis Morio penaos e oa ar bourk d’ar mare-se, gant atantoù e kreiz ar gumun, tiez kozh… Evel e meur a barrez eus Breizh-Izel : Ur garnel e oa er vered tro-dro d’an iliz ivez.
Un digarez eo ar vaketenn-mañ da gomz eus Pierre Noury, bet person Begnen da vare an Dispac’h Bras, ivez. Beleg rebel d’ar renad nevez ma oa eñ ha… tik gant ar brezhoneg war un dro rak enskrivadurioù diwar e zorn pe diwar e soñj a zo c’hoazh un tammig e pep lec’h e bourk Begnen. A-nes komz eus ar c’hanaouennoù e brezhoneg en deus skrivet.
Moaien zo da welet maketenn bourk Begnen en XIXvet kantved en iliz e-pad miz genver a-bezh !
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
