Gant aferioù Taha Bouhafs ha Damien Abad e ouzomp ez eus lezioù-barn prevez e Bro-C’hall hiviziken.
E-barzh La France Insoumise ez eus ul lez-varn prevez m’emañ Clémentine De Hass pe Caroline Rousseau en he fenn war a seblant. N’eo ket bet na barnet na kondaonet ar Bouhafs gant ul lez-varn ofisiel ha publik met kondaonet eo bet dija gant lez-varn LFI ha hini ar rouedadoù sokial. Ha kondaonet da virviken memes rak embannet eo bet gant ar merc’hed o teurel ar bec’h warnañ ne vo ket savet klemm ganto. “kuit da servijet da reoù zo” (“an tu-dehou pellañ”, anat deoc’h) emezo. Setu kondaonet un den gant ur justis brevez hep bezañ bet tro da zifenn e grampouezhenn dirak ul lez-varn ofisiel !
Memes tra e “Renaissance”. Kaset ez eus bet ur gemenadenn d’ar strollad politikel gant ur gevredigezh feminist bennak ha setu Damien Abad rediet da reiñ e dilez gant Mari-Strap-latenn. Gwechall e tlee an dud bezañ kondaonet a-raok diskregiñ gant o c’hargoù. Bremañ, ur “gemenadenn disklêriañ” kaset gant forzh piv a zo a-walc’h. Biskoazh kement-all !
Ne fell ket deomp difenn Taha Bouhafs pe Damien Abad amañ ha ne fell ket deomp difenn ar re a dag ar merc’hed. E mod ebet. Met emañ ar justis e Bro-C’hall o treiñ da fall. E-pad pell e voe mare ar “justis-arvest” met ur justis e oa memestra. Hogen, bremañ, abaoe #Meetoo bepred, n’eus ket mui anezhi. Ne fell ket d’ar merc’hed sevel klemm ha kondaonet ar baotred kerkent ha skrivet o anv en ur rouedad sokial bennak. N’eus ket mui anv a “c’houlakadenn digablusted” evit ar re lakaet en arvar met a “c’houlakadenn wirionez” evit ar re a daol ar bec’h. “Ni a ro kredenn deoc’h” zo deuet da vezañ kredo an amzer-vremañ.
Betek pelec’h ez aio tout-se ? Da betra servij votiñ lezennoù ha kaout reizhiad barnerezhel aze ?
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
