Brest (29) : « Tata » a oa e penn un trafik dramm

Perak mont da labourat bemdez war e vicher onest evit ur bennozh doue hag eñ dastumet arc’hant evel mengleuzier gant tud o trafikañ dramm. E « kartchier » Bellevue e Brest e oa bet diskoachet ur poent deal (ouzhpenn !) gant ar boliserien. E-barzh ur ranndi eus straed Kermenguy e oa kalz tud o tremen noz-deiz. Ha ne oa ket evit kannab pe lambig, evit heroin ha koko ne lavaran ket. Dre forzh evezhiañ al lec’h e komprenas ar boliserien penaos e veze aozet an trafik gant ar skipailh : daou pe tri den a oa e-harz ar savadur o c’hortoz ar pratikoù ha kerkent ha klaouet ar c’hlient e veze kaset d’an nec’h, er ranndi, da brenañ o dozenn.

Etre 25 ha 30 gwerzh a oa bemdez hag ar pennoù-dramm a c’helle koñsomiñ o foezon en dirri hag en hall mont tre. Strinkelloù e pep lec’h, ur gwir baradoz evit ar familhoù onest !

Pa tegouezhas ar boliserien da 6e mintin e oa ur pratik er ranndi dija o c’hortoz e zozenn. E-barzh ar ranndi e kavas ar c’hargidi koko, hero ha kannab. Bep eil deiz e veze livret ar skipailh gant ur marc’hadour e gros, ur gwir PME !

Ha piv a oa ar skipailh a-benn ar fin ? E penn an trafik e oa « Tata », ur vaouez, 38 bloaz. Evit he sikour, tri den all en o ugent ha tregont vloaz. « Tata » a oa anavezet mat ar « c’hartchier ». Gant he boutik e veze gounezet 1500€ bemdez evelkent !

Tata hag he c’homper pennañ a zo bet kaset d’an toull-bac’h da c’hortoz o frosez a-benn miz genver. An daou all a zo bet barnet buan : 12 mizvezh a doullbac’h gant goursez evit an hini 26 bloaz, C’hwec’h mizvezh gant goursez ivez evit egile.

Illustration : DR
[cc] Article relu et corrigé (orthographe, syntaxe) par ChatGPT.

Breizh-info.com, 2025, dépêches libres de copie et de diffusion sous réserve de mention et de lien vers la source d’origine