Hag en defe Paul Molac toullet un erv hag a za betek Pikardi ? Abaoe reuz al lezenn Molac ez a war-raok ar stourm evit ar yezhoù rannvro un tamm e pep lec’h, betek e Pikardi.

Disadorn dremenet eo bet sinet ar garta evit ar pikardeg gant kumun Iucourt (Eaucourt-sur-Somme) e departamant ar Somme. Ar gumun gentañ eo. Hag aotrouned a oa el lid : Patricia Poupart, kuzulierez ar rannvro Haut de France, Stéphane Haussoulier, prezidant an departamant, Pascal Demarthe maer Abbeville ha prezidant kumuniezh kumunioù ar Baie de Somme, Anne Tiberghien prezidantez Ajañs ar Pikardeg, … . Ar pezh a dalv eo ar sin gentañ-se un dra a-bouez !

12 engouestl a zo bet sinet gant Iucourt : panelloù divyezhek, talbenn paperachoù ar gumun e pikardeg hag e galleg, abadennoù e pikardeg evit bugale ar skolioù, ur bajenn e pikardeg war lec’hienn ar gumun, pourmenadennoù e pikardeg hag ul lodenn eus prezegennoù an aotroù maer a c’hello bezañ e pikardeg ivez !

https://www.facebook.com/languepicarde/photos/pcb.2875371456086890/2875365469420822