Evel e Breizh, emañ ar bed sevenadurel katalan eus Norzh-Katalonia o foetañ boutik er mare-mañ. Berr an arc’hant, berroc’h-berrañ ar skoaziadennoù publik hag uheloc’h-uhelañ ar frejoù. Radio Arrels, ur radio e katalan eus an Norzh, a zo en arvar bras da skouer.
E miz genver e oa bet lañset ur galv gant ar Bressola (skolioù e katalaneg dre soubidigezh) : un toull a oa er c’hef hag e kinnig ar rouedad skolioù debriñ e strapenn. 200 000€ en doa reklemet ar gevredigezh digant departamant Pireneoù ar Reter hag ar rannvro Okitania. A-hend-all e oa an alchwez dindan an nor.
5 miz warlerc’h setu savetaet La Bressola. Abalamour da Gatalaniz, da embregerezhioù zo ha da ensavadurioù zo : 710 000€ en holl a zo bet rastellaet e-korf pemp miz memestra !
Met arabat krediñ eo bet brokus an ensavadurioù gall eus an Norzh. Diwar ar 710 000 n’eus ket nemet 15,5% eus ar sammad a zo bet roet gant tud pe ensavadurioù eus ar stad gall. Ar peurrest a zo bet roet gant… Katalonia ar su !
210 000€ a zo bet roet gant deputasionoù Barcelona, Girona ha Llèida, 185 000€ a zo bet profet gant ar c’hevredigezhioù ken sevenadurel ken broadelour a Òmnium Cultural ha Assemblada Nacionala Catalana ha 150 000€ a zo bet votet gant ar Generalitat de Catalonia. Eus o zu, zo bet roet 80 000€ gant ar rannvro Okitania, 55 000 gant kumunioù eus an Norzh hag an « Associacion Catalana de las Municipalitats » ha 30 000€ gant departamant Pireneoù ar Reter.
Goulennet e vo muioc’h gant ar familhoù ivez : ur c’hresk a 10% eus ar sammad roet betek-henn a vo lakaet e pleustr.
« Savetaet omp gant ar su ar wech-mañ met n’hallo ket hen ober da viken » o deus lavaret pennoù bras La Bressola.
Crédit photo : pajenn Facebook La Bressola
[cc] Breizh-info.com, 2025, dépêches libres de copie et de diffusion sous réserve de mention et de lien vers la source d’origine
