Er skol publik eus Charcenne-Autoreille (Saône-Uhel) er Bourgogn, emañ ehanet ar peder skolerezh hag ar skoazellerezh. Ehan kleñvet. Ha kleñvet spered. Perak ? Abalamour da zaou skoliad. An daou-se a zo e div glasad disheñvel ha sikouret int war ar pemdez gant un AESH. Met ne cheñch ket an traoù : feuls ha torr-penn int ha n’hall ket mui ar skolerezed labourat war o micher e koñdisionoù mat.
Pleget o deus ar gouarnamantoù kozh dirak ar c’hevredigezhioù a vugale ampechet a felle dezhe e vefe skoliataet an HOLL vugale ampechet pe o spered mesket er skolioù normal. Ur afer a « voral » e oa. Dav e oa bezañ « iñkluzif » hag un dra vat eo bet evit ur bern bugale gant diaesterioù, gwir eo. Met lod n’o deus netra d’ober er skolioù « hollek ». Ha pa vezont feuls war ar marc’had e tle ar skolaerien difenn ar vugale all ha sioulaat ar jeu gant o zud, da beder eur hanter.
Amañ c’hoazh ez eus bet kemeret un diviz « moral » ha n’eo ket un diviz poellek ha reizh. An HOLL vugale gant diaesterioù a zo bet degemeret er skolioù mod-all ne vefe ket reizh e-keñver ar moral, d’ar skolaerien d’en em zimerdiñ gant se ! Met, d’an nebeutañ, setu sioulaet ar c’hevredigezhioù hag e c’hell ar gouarnanamant lavarout dirak an dud ez eus bet graet traoù evit ar vugale ampechet pe mesket o spered.
Ur skandal eo !
Evel just n’eo ket moral da skrivañ se. Ha bugale aotek, trizomek pe gant ezhommoù dibar zo o deus o flas er skolioù met n’hall ket AN HOLL bezañ degemeret er skolioù normal rak ne fell ket d’o zud e vefe lakaet o bugel en ur skol « disheñvel ». Kompren a ran anezhe ha moarvat e vefent evelte m’am bije ur bugel « disheñvel ». Met penaos e vevont an traoù pa oaront eo feuls pe torr-penn o bugel en ur c’hlas met n’hall ket ar rener pe ar skolaer skarzhañ anezhañ peogwir n’o deus ket droad d’hen ober ? Penaos e respontont ouzh selloù tamall ar gerent a denn o bugale an eil war-lerc’h egile peogwir e leñvont bemnoz abalamour da « Vathys en deus skoet ganin c’hoazh » ?
Ipokrit eo ar stad-se evit an daou du.
Ha petra a vez lavaret gant ar rektorelezh pa c’hoarvez seurt tra ? Barnadennoù moral evel just : « arabat stigmatizañ », « dav eo bevañ asambles », dreist-holl ma vez ar bugel « problematek » hag e familh eus ur sevenadur all…
Ha muioc’h-mui a vugale problematek a zo er skolioù ? N’ouzon ket. Marteze. Hogen, ar pezh zo sur, evel ma vez kont gant an enbroerezh, bez ez eus ar moral, an teoriennoù, an « iñkluzivelezh » deuet da vezañ ur relijion eus un tu, hag ar fedoù, ar wirionez war an dachenn eus un tu all.
[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.
Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.
