Fellout a ra da akademiezh Naoned serriñ div glas eus skolioù Banaleg-ar-Gevred ha Henwinieg, e Bro-Gwiniegi Naoned a-benn miz gwengolo 2022. Savet o deus tud ar vugale o mouezh rak, hervezo, eo diboell penn-da-benn seurt diviz.
Embannet e oa bet gant an akademiezh e vo serret ur c’hlas e skol Marcel Pagnol eus Banaleg “e kenkaz e vefe chomet evel-se an niver a vugale enskrivet”. Hogen, gant an devezhioù dorioù digor e oa bet kaieret muioc’h a vugale (185) eget an niver rekis a oa bet lakaet gant an ensellerez (182). Ne vern ! Da vezañ ma vo bugale a-walc’h e miz gwengolo e vo serret ur c’hlas memestra, setu ar pezh a zo bet embannet krak-ha-berr gant an akademiezh. Fuloret ruz eo tud ar vugale anat deoc’h rak ne gomprenont seurt !
Hag ar renerez da ziouganiñ e vo muioc’h eget 30 skoliad er c’hlasoù skol-vamm a-benn miz gwengolo !
Ur petition a zo bet lakaet en-linenn gant tud ar vugale kement ha lakaat gwask war an akademiezh.
Memestra e skol bublik Paul-Emile Victor eus Henwinieg, e Bro Gwiniegi atav, ma vo serret ur c’hlas tra ma oa bet serret unan warlene endeo. Etre 20 ha 22 bugel a zo e klasoù skol-vamm koulskoude ha kudennoù emzalc’h don gant lod. Met ne vern, nac’het he deus an ensellerez dont d’ar c’huzul skol d’ar c’hentañ a viz ebrel zoken. An itron vaerez, kuzulierien, kelennerion ha tud ar vugale oa oa ouzh he gortoz ha padal n’eo ket deuet.
Da c’hortoz un emvod etre servijoù an akademiezh ha tud ar skol ez eus bet lakaet ur petision en-linenn
Foto : APE Banaleg-ar-Gevred
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
