E Hengoat e bro Dreger eo serret iliz Sant-Maodez abaoe miz kerzu 2019. Rak deuet eo da vezañ dañjerus, dañjerus-tre zoken. Endu a gouezhe e-pad an oferennoù, mein a-wechoù. Siwazh n’eo ket sur e c’hello bezañ savetaet ar savadur sakr. Rak savet eo bet war ur seurt « douar traezh » ha n’eo ket stabil-tre. Evit he saveteiñ e vefe dav dispignañ 2 vilion a euroioù. Gleborus eo ouzhpenn-se hag al labourioù a zo bet graet enni ha tro-dro o deus gwashaet an traoù.
Met penaos lakaat kement ha arc’hant war an daol evit ur gumun a 220 anneziad ? 30 000€ a zo bet lakaet gant ar gumun dija evit ober al labourioù mallusañ ha klask skarzhañ ar gleboraj. Met gouzout a ra ar gumuniezh kumunioù e tleo digeriñ he yalc’had evit sikour Hengoat deiz pe zeiz.
Un enklaskadenn foran a vo aozet evit ma vefe roet ho soñj gant tud ar vro. Hag un doser a vo savet evit goulenn sikour ar Fondation du Patrimoine hag ensavadurioù foran all. Ma vez asantet ganto e c’hello bezañ savetaet iliz Sant-Maodez.
Crédit photo : Spandeau pour Wikipedia
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
Une réponse à “Hengoat (Bro Dreger) : un iliz o kouezhañ en he foull”
Dre ma ne bleustr ket ar Vretoned o ilizoù e kouezhint deiz pa zeiz en o foull.
N’eus ket da souezhiñ gant an dra-se : natur eo d’un dra na servij ket mont da netra e-unan, nemet ez asantfe an dud e vefe tennet an ilizoù ha chapelioù fiziet gant lezenn 1905 en Iliz katolik, ha gouestlet hiviziken d’an douristelezh a-yoc’h.
Neuze e vo kavet arc’hant.
Er pleustr ez eo an dra-se a c’hoarvez forzh penaos : a-vec’h eo pa c’houlenn c’hoazh o aotre an tiez-kêr digant ar bersoned pa vez anv da gempenn diabarzh an ilizoù.