Abaoe m’eo bet embannet al lid emañ tout ar bedig-bed « homo festivus » parizian o tridal gant al levenez. Hervezo e vefe an holl dud marvet diwar ar SIDA « stourmerien » kouezhet « war dachenn ar brezel ».
Gwechall e veze graet « stourmer » eus ar re o doa stourmet evit ar vro, evit ur vaouez, evit o familh, evit ur c’haoz bennak. Bremañ e vez graet stourmer eus forzh piv. Eus ar re o deus fouzet da skouer. Evel just ez eus bet tud (hag ez eus c’hoazh) kontammet gant ar SIDA ha n’o deus ket tapet ar virus dre c’hoari gant forzh piv pe kemer drogach. Tud tanav o gwad da skouer, peotramant yaouankizoù hag o doa bet un nozvezh plijadur hep bezañ gwarezet. Met daoust hag eo « stourmerien » anezho ? Ha perak e vefe « stourmerien » ar re glañvet diwar ar SIDA tra ne vefe ket ar re baket ganto ar c’hrign-bev pe ar c’hovid pe ar grip da skouer ?
Marteze peogwir eo kentoc’h tud eus ur gumuniezh ispisial a zo bet klañvet da gentañ gant ar SIDA. E penn-kentañ tout an epidemiezh bepred. Hag abaoe un nebeut bloavezhioù, eo bet lakaet ar re-se da « zibab tud » ! « Holen an douar » ! Harozed dre natur ! Hag o durc’hadur revel eo deuet da vezañ ar c’hiz nevez !
Setu, forzh pe hini a c’hell bezañ lakaet « stourmer » bremañ, forzh petra bennak en defe graet. N’eus ket, e kêr ebet, ur blakenn evit ar re marvet diwar ar labour, an amiant, ar Mediator peotramant diwar ar sponterezh islamek met bez ez eus ur blasenn evit ar « stourmerien » marvet diwar ar Sida. Biskoazh kement-all !
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
Gwelloc’h e vefe : « Place des combattant.es ».
http://www.combatenligne.fr/article/?id=1