An holl Roazhoniz kozh o deus dalc’het soñj eus labouradeg Citroën ar Barre-Thomas, etre hent an Oriant hag an hent-tro. Gwechall e oa labourerien e kreiz-kêr Roazhon, tamm-ha-tamm ar re-se zo bet kaset tro-war-dro da Roazhon ha bremañ emaint e Bro-Sina.
War lec’hienn ar Barre-Thomas emañ ar Post o paouez prenañ un dachenn a 19 000m². Warni emañ an embregerezh o sevel ur c’harrdi ramzel a 5767m². Fellout a ra d’ar Post kreizennañ ennañ ar c’hreizennoù lizhiri eus Noal-ar-Gwilen, Pazieg, Bruz, Lanvezhon, Egineg hag 8 kumun all eus Bro Roazhon. Ne vo ket mui dibabet ha rummet ar pakadoù Colissimo er c’humunioù-se neuze met e kreizenn nevez ar Barre-Thomas. 123 post a vo distrujet war un dro ! Ha rediet e vo ar re ne vo ket kaset er-maez da vont da labourat er Barre-Thomas hiviziken. Hogen, darn a oa o chom pell eus Roazhon hag e stankadegoù (dreist-holl tro-dro d’ar vBarre-Thomas !) met ne vern. Dav eo mont gant al labour, evel er Stadoù-Unanet !
Ha zo gwasoc’h : nebeutoc’h eget 50% eus koskor ar Barre-Thomas en do ur c’hevrad hag ur statud a bosterion, eilkevratourien a vo en holl reoù all ! Ouzhpenn-se n’eo ket tud ar Post a zegaso an holl golissimoioù deoc’h rak 30% eus ar pakadoù a vo fiziet da embregerezhioù prevez. E berr komzoù : tamm-ha-tamm e vez dic’hraet e vragoù da Yann Postour !
SUD PTT en deus galvet al labourerien da chom a-sav gant al labour d’an 31 a viz meurzh 2022 evit sevel o mouezh a-enep seurt raktres enep-sokial. Sindikadoù all a zo en aviz ober ar memes tra.
Goude an « Erlerc’hiadur Meur etnek », an « Erlec’hiadur Meur sokial » !
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
