Klasoù divyezhek serret : dre faot piv pe dre faot petra ?

Emañ an Emsav o sevel e vouezh o welet kement a glasoù divyezhek brezhoneg-galleg serret amañ hag ahont ar bloaz-mañ. E Karaez, er C’hap, e Bear, …

Met pet a glasoù unyezhek a vo serret ar bloaz-mañ ivez ? Pet a skolioù a vo serret da vat zoken. Hag ur skol serret ne vo ket addigoret goude. Troet e vo e bod-arsav evit boomerien o vale ha mat pell zo. Echu gant youc’hadegoù ar vugale er bourk !

Met dre faot piv pe dre faot petra e vez serret kement a skolioù ar bloaz-mañ ? Dre faot Loïg Chesnais-Girard, prezidant ar Rannvro ? Hemañ zo bet lakaet bouc’h ar pec’hejoù gant emsaverien zo evit tout an tagadennoù a-enep ar brezhoneg. Un tamm « bounner » eo a-wezhioù.

Met amañ n’eo ket dre faot piv e vez serret hor skolioù met dre faot petra. Dre faot an diouer a vugale. Setu ! E kumunioù bihan zo ez eus bet serret skolioù ma oa 6 bugel enne abaoe bloaz. Lod a oa skolioù-mamm, neuze e veze implijet ur skolaer pe skolaerez hag ur skoazellerez, paeet gant an Deskadurezh-Stad hag an ti-kêr. 2 zen leun amzer evit c’hwec’h bugel !

Gwechall ne oa ket ur skol e pep kumun, oh nann, e oa div pe teir, gant ar skolioù-kêriadenn. Pa ne oa ket ur skol bublik mui ur skol gatolik ouzhpenn e lec’hioù zo ! Perak ? Peogwir e oa bugale e-leizh e Breizh. Bugale e pep lec’h, 5 pe 6 e pep familh. Neuze e veze savet tiez-skol ha leun e oa ar c’hlasoù. Siwazh ne oa ket klasoù divyezhek d’ar mare-se.

Ha c’hoant ‘peus e vefe miret ar c’hlasoù divyezhek pe ar skol en ho kumun ? Grit bugale tudoù ! Ma vez graet un dek bennak ganeoc’h e c’hello ar gumun addigeriñ ar skol gozh evidoc’h nemetken zoken !

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.