Ur vro eus an Trede Bed eo deuet da vezañ Bro-C’hall. N’eo ket bet tennet tamm refleksion ebet eus enkadenn ar C’hovid hag emañ hor sistem yec’hed o vont d’ar strad muioc’h-muiañ.
E ospital Redon e oa serret an Trummadoù e-pad an nozvezhioù abaoe miz du, astennet e vo an diarbenn-mañ betek miz c’hwevrer ! Ur medesin a zo nemetken hag e c’hell bezañ galvet gant ar SMUR.
E Kemper, An Oriant ha Brest SOS Medisin a zo beuzet ivez, biskoazh n’o deus ket bet ar 14 medisin kement ha taolioù pellgomz. N’int ket mui evit reiñ fas d’al lañv a dud klañv diwar ar grip, ar C’hovid hag ar bronkiolit. Memestra el Liger-Atlantel : un diouer a vedisined, a glañdiourezed mui an teir epidemiezh o skeiñ war un dro, setu ar Samu etre beuziñ ha neuñviñ.
Keloù mat evit echuiñ : e Sant-Turiav, e bro-Pondi, e vo digoret un ti yec’hed e miz genver ! Unan all a zo war ar stern e Mêlrant gant ur skourr e Gwern. Dilennidi ar vro o deus stourmet evit an tiez-yec’hed-mañ ha n’eo ket ar servijoù kreiz e Paris.
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
