Setu un iliz all hag a vo distrujet ! E Maodilon, e Bro Gwiniegi Naoned, e vo distrujet an iliz, hini ar bourk. Perak ? Savet e 1870, an iliz nevez-gotek-mañ a zo leun a zefotoù a-zeroù. Abaoe pevar bloaz emañ serret ken dañjerus eo deuet da vezañ. Mein a vez o kouezhañ ingal hag un dogenn en he fezh a zo en em zistaget diouzh ur voger.
Ur bodad-labour a zo bet savet evit kavout un diskoulm, ennañ ar maer hag ar person. Ha dav eo distruj an iliz ha sevel unan nevez da heul ? He reneveziñ ? Pe distruj ul lodenn ha reneveziñ ar peurrest ? Abalamour d’al lezennoù falakr enep-kristen n’hallo ket ar parrez hag ar gumun kaout arc’hant digant ar stad, ar rannvro pe an departamant. Arabat reiñ arc’hant d’ar relijion ! (war-bouez unan ?)
A-benn ar fin eo bet dibabet da zistruj an iliz en he fezh pe ul lodenn nemetken. Hag adsevel. Ur studiadenn teknik a vo lañset ha kemeret an diviz e 2024. D’an nebeutañ e vo savet an iliz nevez er memes lec’h rak ur gleuzenn a zo ha miret e vo anezhi mod pe vod. Da c’hortoz e c’hello ar gristenien pediñ er gleuzenn-mañ ma c’hell en em dolpañ un daou-ugent den bennak.
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
