Setu ar pezh a c’hell c’hoarvezout pa glasker gounit arc’hant buan hag aes : daou lojamant feurmet dre vBooking a zo bet gwastet e Sant-Malou warlene ha barnet e oa ar c’houmananter ar sizhun-mañ. D’ar 15 a viz mae 2023 e voe resevet ur gemenadenn gant perc’henn ul lojamant eus straed Toulouse e Sant-Malou intra-muros. « Feurmet eo hol lojamant evit un nozvezh ! » Gant ur paotr yaouank ha n’en deus ket roet nag e niverenn bellgomz gwir nag e anv familh gwir. Partiet fall an traoù met ne oar ket ar berc’hennez tout-se c’hoazh.
Un nebeut eurvezhioù war-lerc’h e tleo an amezeien pellgomz d’ar boliserien : ur gador a zo bet stlapet dre ar prenestr. Ur fest a zo ‘barzh hag emañ ar c’houvidi o treiñ sot gant ar boeson ha traoù all moarvat. Pevar den yaouank a zo serret tro-dro d’ar ranndi gant ar c’hargidi. E-barzh ar savadur eo Sodome ha Gomorrhe ! Kaoc’h a zo el liñselioù, ar pezhioù-arrebeuri, an taolennoù, ar plañchod a zo drastet.
Eizh devezh war-lerc’h e voe ar memes c’hoari : gwastet zo bet ur ranndi feurmet dre vBooking adarre. Laeret eo bet ar skinweller ar wech-mañ.
Ha piv en deus feurmet an daou ranndi-mañ ? Atav ar memes paotr yaouank. Ur braller-e-gloc’h en e 23 vloaz.
D’an 09 a viz genver e oa dirak ar barner e lez-varn Sant-Malou. Evel just, n’en deus graet netra an daou zevezh-se ha forzh penaos e oa o kousket a-hed an daou nozvezh. Un hun kallet !
« N’eo ket me en deus gwastet an daou ranndi, m’hen tou deoc’h aotrou barner ! » « Ch’ti jure ! » Piv ‘ta ? Ne oar ket…
17 000€ a zo goulennet gantañ gant an eil perc’henn. « Bah ya met penaos e c’hellfen paeañ kement me, uh ? » a lavaras Momo e fin an dalc’h.
A-benn ar fin eo bet kondaonet da c’hwec’h mizvezh gant goursez mui 70 eurvezh a labour. Nemetken !
Hag ar berc’hennerien ? Gallout a reont ober daoulagad gwenn. Ha leñvañ ! Trugarez an ekonomiezh mod AirBnB !
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
