Bilañs ar votadegoù 2024 e Bro-Euskadi : ar PNV war-gil, an RN war-gresk

Da geñver fin ar bloaz zo bet embannet gant Mediabask ur rentañ-kont diwar-benn ar votadegoù a zo bet e Bro-Euskadi, norzh ha su, e 2024. Hag emañ ar bed politikel o cheñch en Euskal Herria !

Da gentañ, n’eo ket mui ar PNV mestr war ar bolitikerezh euskarad evel ma oa kont betek-henn. E miz ebrel e oa bet galvet an dud da votiñ evit ar parlamant emren. EH Bildu, an tu-kleiz dizalc’hour pellañ a erruas en eil plas just war-lerc’h ar PNV (ur forc’had a 30 000 mouezh nemetken etre an daou) met an daou strollad broadelour o deus bet ar memes niver a gannaded a-benn ar fin. Kollet zo bet 3,88% gant ar PNV ha gounezet 4,53% gant an abertzale eus an tu-kleiz. En trede plas emañ ar PSOE gant ar memes niver a vouezhioù hag a-raok mui-pe-vui (14,09% +0,57). Gounezet zo bet 0,9% gant Vox (1 sez) met pell-pell eus ar podium emañ ar strollad broadelour spagnol c’hoazh.

Evel ma oa kont betek-henn e voe skoulmet un emglev etre ar PNV hag ar PSOE evit gouarn ar gumuniezh emren evel ma oa dija.

E Navarra e oa bet votet evit ar parlamant e 2023.

Evit ar votadegoù Europa d’an 9 a viz even e kendalc’has an traoù gant o hent : ar PSOE an hini eo a erruas er plas kentañ ! War e lerc’h EH-Bildu. Ar PNV, eus e du, a voe kaset d’an trede plas !

An RN o c’hounid tachenn

Er su e voe ar votadegoù Europa ur sapre souezhadenn met en Norzh ez eas pelloc’h an traoù : an RN an hini eo a voe trec’h gant 22,7%, da lavaret eo +8% e-keñver 2019. E 96 kumun diwar 158 e erruas strollad Bardella er plas kentañ.

E Bro-C’hall a-bezh e tizhas Bardella an 31,5%, neuze n’eo ket bet ken uhel an disoc’hoù en Ipparalde met ur sapre cheñchamant eo memestra.

Evel e pep lec’h e voe kentoc’h an NFP a c’hounezas an trec’h er votadegoù kannad en Norzh : 3 kannad NFP evit an tiriad, unan anezho a zo un abertzale memestra : Peio Dufau (EHBai) er c’hwec’hvet pastell-vro. Met ar wech-mañ ivez e voe uhel disoc’hoù an RN : 28,39 % evit Victor Lastécouères er c’hwec’hvet (3de plas), 39,52 % evit Serge Rosso er pemvet (eil plas) ha 28,92% er 4re evit Sylviane Lopez (2de plas).

N’eo ket azv an traoù c’hoazh en Ipparalde met tamm-ha-tamm emañ an RN o c’hounid tachenn… Ha pegoulz e vo savet ur « Palatinak » broadelour evel e Bro-Gorsika ?