Fin evel ul louarn ! Ur c’hwiblaer en e dregont vloaz eus Sèvremoine en Anjou en doa laeret arc’hant dre an e-koñvers da gantadoù a dud pe embregerezhioù etre 2014 ha 2019. D’an 21 a viz c’hwevrer e oa dirak ar barner e Naoned.
E 2019 e oa bet serret gant an archerien o vleniañ e garr-tan, ur Mercedes Klas C mar plij. Gantañ e oa pakadennoù filmet c’hoazh hag ur bistolenn alarm. Mont a reas an archerien betek e ranndi eus Naoned ha souezhet e oant bet o tizoloiñ pakadennoù a-vil vern. Ur gwir karrdi Amazon ! Ha dreist-holl e kavjont ar soudarded arc’hant, 70 kartenn-anv gant anvioù disheñvel met atav ar memes foto ha seizh aotre-bleniañ ken faos all. Un e-c’hwiblaer e oa ! En holl en doa laeret evit 95 000€ a zafar a bep seurt.
Gant ar c’hartennoù-anv faos e oa deuet a-benn da feurmet ar ranndi e karter ar Bottière met ne baee ket ar feurm d’ar perc’henner. Daou gomper e oa o reiñ an dorn dezhañ e-barzh e embregerezhig, unan anezho anavezet mat gant ar justis evit bezañ bet kondaonet evit aferioù trafikañ dramm dija.
Ne oa ket ar paotr ar Mercedes un aelig ar baradoz kennebeut : c’hwec’h gwech e oa bet kondaonet dija ha forzh penaos en deus un emgav all e lez-varn La Roche-sur-Yon evit un afer all.
E Naoned atav eo bet kondaonet da zaou vloavezh toull-bac’h mui unan gant goursez. Sammadoù arc’hant spontus en deus da restaolañ ivez, en o zouez 50 000€ da C-Discount !
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
