Reuz e Torigneg-Fouilharzh (35) diwar-benn an divroidi

Abaoe 8 miz ez eus ur c’hant a zivroidi oc’h ober kamping e park ar Gayeulles e Roazhon. Ar pezh zo, ar park-se a zo stok ouzh kumun Torigneg-Fouilharzh. Ur maer ekolo eo a zo e penn ar gumun-se, Gaël Lefeuvre hag a zo rener Air Breizh ivez. Pezh a dalv n’eo ket eñ ur paotr Zemmour tamm ebet ! Hogen, kinniget ez eus bet gant ar skouted « Eclaireurs de France » kreizenn vakañsiñ ar gevredigezh e Torigneg-Fouilharzh evit degemer un tregont a repuidi. Un tri-ugent bennak a zo bet kaset eno kerkent.

Bah ya, met gant ar maer eo bet kaset ar bodad surentez kement ha gwiriekaat e oa mat pep tra a-fet surentez. Hogen, n’en deus ket roet ar bodad e asant da heul ar weladenn, war a seblant ez eus traoù a-dreuz ha n’int ket diouzh al lezenn. ‘Pezh a dalv n’hall ket ar repuidi ober annez er greizenn. Me ‘gomz dit ! Un tregont a dud o deus en em staliet e-barzh an ti ha fellout a ra dezho chom ennañ mod pe vod. Ha 34 all o deus staliet teltennoù tro-dro d’ar greizenn ! Ma c’hoarvezh un dra a-dreuz, un tan-gwall pe me oar, eo ar paourkaezh maer ekolo a vo kiriek hervez al lezenn ! Aon o deus ar c’haochisted e sinfe Gaël Lefeuvre ur skrid-embann evit skarzhiñ ar skwaterien hag e kasfe ar fliked da heul, memestra.

Met penaos ober evitañ ? Hag eñ ekolo ! Pa weler penaos e tro an traoù e EELV gant ar « rousseauisted » o kemer muioc’h-mui a bouez… Ma vez galvet ar fliked gantañ e vo kontet da « faskour » ken sur ha tra !

Da c’hortoz e sko ar c’haochisted ouzh Gaël Lefeuvre par ma c’hellont war o lec’hiennoù kelaouiñ…

Crédit photo :

[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine

- Sécession la première parution de Yann Vallerie, rédacteur en chef de Breizh-info -

- Je soutiens BREIZH-INFO -

PARTAGEZ L'ARTICLE !

LES DERNIERS ARTICLES

ARTICLES LIÉS

ABONNEZ VOUS À NOTRE NEWSLETTER

Pas de pubs, pas de spams, juste du contenu de qualité !