Ha kontet e vefe bet da “venlazh” ma vefe bet lazhet ar vaouez ? E Sant-Brieg, ur plac’h a 32 vloaz a zo bet kondaonet dimerc’her dremenet evit bezañ kontellet e mestrez.
D’ar c’hentañ a viz even 2021, poliserien eus komiserdi Sant-Brieg a zo galvet en ur ranndi. Pa erruont, ur vaouez a zo gloazet war al leur, toullet e bruched : kontellet eo bet ha gwad a zo e pep lec’h. Er ranndi ez eus ur vaouez all. An div blac’h a zo par(ez) ha parez, met ne anzav ket diouzhtu ar vestrez eo hi he deus kontellet he mignonezh. E penn kentañ e kont koñchoù born d’ar boliserien, memes. Gouez dezhi he defe he dousig risklet war al leur ha kouezhet war ar gontell ! Biskoazh kement all !
E penn kentañ e felle d’ar barner kas anezhi dirak al lez-varn evit bezañ klasket lazhañ he mestrez met ar vestrez a reas he seizh gwellañ evit ma vefe tamallet he bourevez da “feulster grevusaet” nemetken ! Karantez pistrius, karantez toull, petra ‘ri…
Ha padal ne oa ket ar wech kentañ e skoe ouzh he dousig, ken ez eus bet komz eus ur vaouez troet warni hec’h-unan e-pad ar prosez, ur gwir vac’homerez hervez ar barner ! Petra ? Estreget ar wazed a c’hell bezañ tirantoù familh ? N’eo ket gwir !
Met ne vern, sot-pitilh eo ar vaouez c’hloazet gant he euzhvil. “Pa vo dibrizonet e c’hellimp bevañ asambles adarre, sklaeroc’h e vo an amzer” emezi.
N’eo ket diouzhtu e c’hello an div durzunell grougousat asambles etre div flac’had avat : kondaonet eo bet ar “butch” da 5 bloavezh toull-bac’h ha n’hallo ket mont e darempred gant he dousig a-c’houde pell.
Ar justis patriarkel adarre !
[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine
