Ezhomm o deus ar vretoned da zeskiñ o istor, setu un dra anat ! Marteze e c’hello Breizh 1341 sikour anezho d’hen ober. Gant ur Gwitregad, Laurent Gary, eo bet krouet ar c’hoari-mañ. E 1341 emañ an daou c’hoarier, e kreiz brezel Hêrezh Breizh goude marv Yann III. Ar re a-du gant ar saozon hag ar re a-du gant ar c’hallaoued zo vont d’en em ganañ e-pad 23 bloaz diwar-goust pobl Breizh. Echu a raio ar brezel gant feur-emglev Gwenrann e 1365 goude trec’h ar re a-du gant ar Saozon.
Pep c’hoarier a zo e penn un arme, pro-saozon pe pro-gallaoued. Ha gant piv e vo gounezet kurunenn Breizh ? Ha cheñchet e vo an istor ?
Ur c’hoari strategiezh pe “wargame” eo Breizh 1341 : pep c’hoarier a dlee gounit ar muiañ ar gwellañ a diriadoù, a blasoù-kreñv. Evel just n’eo ket bet troc’het Breizh gant Laurent Gary, Bro-Naoned a zo e-barzh. Ha prest oc’h da adober ar brezel etre an div Jeanne ?
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
