An implijidi chalet, ur petision “savetomp EPHAD publik Sant-Kast-ar-Gwildoù” lakaet en-linenn : ne vez ket gwelet mat raktres dilennidi Sant-Kast-ar-Gwildoù ha Sant-Yagu an enez er vro-se !
Kevreet e vo an daou Ehpad eus Sant-Kast ha Sant-Yagu an Enez ! Gant ar spi ne vo ket mesket an annezidi rak a-holl viskoazh zo bet kevezerezh etre tud Sant-Kast ha tud Sant-Jagu. Gwechall ne oa ket ur ral gwelet paotred an daou borzh oc’h en em gannañ war bord ar mor, da skouer. Paour-razh e oa tud Sant-Yagu ha pinvidikoc’h e oa tud Sant-Kast, alese gwarizi ha goapaennoù etre an div gêr.
Met echu eo gant ar mare-se, bremañ e fell da zilennidi an div gumun kevreañ o daou Ehpad. Hogen, unan a zo publik hag egile prevez. Choazet zo bet da lakaat prevez an daou ! Eüruzamant n’eo ket Orpéa pe ur font leve bennak en deus c’hoant astenn e c’hrabannoù war Ehpad Sant-Kast, ur c’henwarez ne lavaran ket, Mutuel Bretagne Retraite.
Ne vir ket ouzh implijidi an Ehpad da gaout aon ha da seniñ ar c’hloc’h : ne fell ket mui d’ar gouarnamant e vefe ti-retredoù re vihan, evel hini Sant-Jagu (24 gwele nemetken) neuze e vez broudet an Ehpadoù bihan da gendeuziñ evit espern argant. Er raktres-mañ e servijfe unan eus an daou savadur evit an annezidi a zo emren, hag egile evit ar re a zo dalc’het da vat.
Aon o deus an implijidi e vefe nullet o statud ha lakaet ar prizioù da greskiñ evit an annezidi. Ha peadra zo d’en em chalañ ! Kondisionoù labour an EHPAD prevez n’eo ket ar memes re ha reoù ar publik ivez.
Evit poent e klask dilennidi an div gumun peurlipat an traoù ha kendrec’hiñ an implijidi ha familhoù zo. Hag, eus o zu, emañ an impljidi o klask sachañ evezh tud ar vro war koñsekañsoù seurt raktres.
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
