Hag unan ouzhpenn evit hor brasañ plijadur : Niverenn 460 Al Liamm a zo deuet er-maez !
Setu an diveradenn embannet war lec’hienn ar gelaouenn :
Barzhoniezh ar gerioù a zigor an niverenn-mañ. Skuizhder ma c’horf a hirvoud Yulia Borisova, e-keit m’emañ Padrig Drean o tamal o Dallentez d’ar re ne ouiont ket gwelet braventez o bed.
Sell an dud hag o ijin a gont deomp Iwan Kerbeleg e 1923. Ur c’hleñved iskis a zo gant Noe avat. Psikoz Noe a vez kontet deomp gant Yann-Ber Kemener. Un droiad dibar e Gouel Broadel ar Brezhoneg a reer gant Karim Laanaya e Horos.
A-viskoazh eo bet pouezus ar c’hafe evit tud ar vro. Ar Bretonezed, ar Vretoned hag o banne rouzig a vez displeget deomp gant Erwan Hupel en Istor Sokial ar Brezhoneg.
Brav ha dañjerus eo Ar Bleiz, gant Hermann Hesse ha troet gant Herve Gouedard.
Fin Beaj Iwerzhon Vefa de Bellaing a vez heuliet en niverenn-mañ. Lodenn ziwezhañ sell ur Breizhadez war Iwerzhon er bloavezhioù 50.
Goude ar reuz bet klevet gant an diskouezadeg Celtique? hon eus kavet brav goulenn digant unan arbennik reiñ e soñj. An tremen eus ar c’heltieg kozh d’ar brezhoneg en Arvorig a vez displeget deomp gant Frañsez Favereau.
Evel kustum ec’h echu an niverenn gant an Heklev Sevenadurel. Burutellet e vez levrioù a bep seurt e A-dreuz lenn ha Petra nevez? hag un toullad Notennoù a lenner er fin.
Ha c’hwi ? Dre beseurt tu e komañsit da lenn Al Liamm ? Gant an « Notennoù » pe gant ar « barzhonegoù » ?
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
