Ur mignon din eus skol-veur Roazhon en doa komzet din eus tri feulvan ar Perfao e Sant-Vran, e Bro Menez. Hemañ a zo tik ouzh ar gallaoueg. Hervezañ eo yezh e gêr genidik (pe dost), Sant-Vran ha yezh e vroig, bro Menez. Esper em eus ne vo ket chalet ma skrivan ar pennad-mañ e brezhoneg. Ne soñj ket din rak deskiñ a ra brezhoneg ivez).
Etre Sant-Vran ha Langourla ez eus daou lec’h heverk : reustr Quemelin (Ker Melin) e Langourla ha peulvanioù Perfao e Sant-Vran. Hag e-korf un endervezh e c’heller gweladenniñ an daou !
Skrivit « Chaos de Quémelin » war google hag e vezoc’h kaset d’ur gêriadenn savet war bord ar stêr Renk. Amañ n’eo ket ur stêr, ur gwazh-dour bras ne lavaran ket. N’emañ ket pell e andon, e Koadlinez. A-hed torgennoù ha flondrennoù Bro Menez e red betek Dinarzh. E Langourla aze eo ur seurt stêr-fround c’hoazh.
Met mont a raimp da weladenniñ reustr Quemelin diwezatoc’h, hiziv emaomp o vont da zizoloiñ peulvanioù ar Perfao.
Da gentañ, dav eo mont a-hed ar Renk war ur c’hant metr bennak. Brav-tre eo al lec’h dindan ar gwez. Reier a zo ma klask an dour en em silañ etrezo. Ul lec’h keltiek-tre !
Goude-se e vo ret deoc’h mont gant an tu-dehou war an hent ha n’eo ket gant an tu-kleiz hag az a betek ar Reustr.
Goude bezañ treuzet parkoù ha koadoù e erruoc’h e-kichen un atant. Just goude ar c’hoadeg, a gleiz, e vo ar peulvan kentañ. Dam-guzhet eo er c’hoad.
N’eo ket bras-tre ha n’haller ket mont da welet anezhañ a-dost, siwazh.
Met 100 metr ac’hann, setu an hini brasañ :
6,60m e uhelder, 3,75m e ledander, n’eo ket dister eo ! Hervez ar pannel a zo bet savet e-kichen ez eus kalz a vojennoù diwar e benn. Gwechall, a lavare an dud, e oa boutiged ha korriganed o rodal tro-dro d’ar peulvan bet savet ganto. O zi e oa. Leun a istorioù a seurt-se eo Bro Menez hervez ma mignon.
500m pelloc’h emañ an trede peulvan. Un tamm bihanoc’h : 4,90m met brav-tre ivez.
Ar pezh a sacho o evezh moarvat : war bord an hent ez eus amañ hag ahont berniadoù mein ha reier. Evel ma vefe bet peulvanioù all gwechall met diskaret gant ar baizanted pe me oar. Darn anezho a seblant bezañ troc’het dre an hanter. Pe marteze e oa o sol.
Ha ma vefe Perfao ur seurt Karnag bihan gwechall ? Setu ar pezh a soñj ar pourmener o welet kement a reier berniet. Hervez un den kejet outañ war bord an hent ez eus ar memes bernioù.
M’ho peus nerzh a-walc’h e c’hellit kenderc’hel ho hent betek kastell Langourla.
N’eo ket kozh-douar (XVIIIvet, gant lodennoù renevezet en XIXvet kantved) hemañ met brav-tre eo ! Arabat tremen e-biou hep mont da welout anezhañ !
Ur wech distroet d’ar c’harr-tan hag a-raok distreiñ da Roazhon e c’hellit mont da saludiñ bez Martial Ménard e Lanrelaz, un nebeut kilometroù ac’hann.
Eflamm Guérin
Crédit photo : DR
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
