B.R.E.T.O.N.S, Krismenn, Gwennyn, hag e talv ar boan da lakaat kotaioù muzik e brezhoneg ?

An dra-se a oa bet reklemet da vare nedeleg : e plas klevet ar memes kanaouennoù nedeleg e galleg mod « O douce nuit » en holl vourkoù Breizh perak ne vefe ket lakaet e plas kanaouennoù hengounel e brezhoneg ? Ha bremañ e vez reklemet gant tud zo kotaioù muzik e brezhoneg war ar radioioù arc’hantaet gant arc’hant ar Rannvro.

Ha reizh e vefe ? Hag a-live gant ar arzhourien etrebroadel eo hon arzhourien ?

Ya ! Feiz ya ! Poent eo lavar krak ha krak an traoù : estreget Stivell, Tri Yann, Nolwenn Le Roy, Denez ha Gilles Servat a zo e bed ar muzik Breizh hag ar re a gan e brezhoneg abaoe un dek vloaz bennak n’eo ket ur vezh o gwelet hag o klevet !

Pa oa bet klevet anv eus kanaouennoù rap e brezhoneg da gentañ e oa bet c’hoarzhet goap oute ganeomp rak, gouez deomp, ne oa ket graet hor yezh evit « se ». Hag a-benn ar fin, selaouit ur c’haner evel Krismenn :

Gant e ganaouenn (kozh un tammig bremañ) « Hunvreoù Merglet » e oa deuet a-benn da skeudenniñ un tu eus mizer sokial ar C’hreiz Breizh mod rap hep reiñ an tu d’ar c’harikatur. Street kredipl ha maezioù kredipl war un dro penn-da-benn !

Plouz ha Fouen a zo karikaturoc’h marteze o c’haori gant emzalc’hoù tipik eus ar rap a-vremañ. Met an nep a gar a gavo e walc’h gante.

Abaoe nebeut e klever muioc’h-mui er festivalioù ur strollad mod « super-band » anvet B.R.E.T.O.N.S. Gante e vez kanet standardoù muzik Breizh evel An Alarc’h, Son ar Chistr pe « c’est un Pays » gant Soldat Louis (skrivañ a reont o kanaouennoù dezhe ouzhpenn bremañ) hag e teu brav gante ! Evit gwir, n’en deus ket ar strollad un dro dioutañ e-unan met nerzhus eo, ken nerzhus hag EV, ar strollad eus Bro-Naoned, hag a zo bet barrek ha talantet re abred. Gweltaz Adeux, kaner EV, a gan e B.R.E.T.O.N.S a-hend-all ha degas a ra e skiant-prenet. B.R.E.T.O.N.S a lako tan en holl leurioù eus Breizh an hañv-mañ, kit da selaou anezhe mar plij kar ur gwir blijadur rock n’ roll eo.

Ha Gwenynn mut-hu ?

Ur ganenerez « variété » eo ya. Ha neuze ? Piv n’en deus ket selaouet kanaouennoù kozh Bonnie Tyler pe Florent Pagny pa oa e-unan en e garr-tan ? Gwenynn a zo a-live gant ar ganerezed variet’ etrebroadel. Ma vez techet o merc’h yaouank pe o c’hoar un tamm romantek da selaou Céline Dion pe Gim’s lakit anezhi da selaou Gwenynn kentoc’h. Ma vefe programet muioc’h war ar radioioù eus Breizh e c’hellfe ober berzh evel n’eus forzh peseurt kanerez variete all.

Memestra evit Madelyn Ann, Clarisse Lavanant pe Aziliz Manrow  hag a c’hellfe bezañ programet aes o-tiv war Frañs Inter pe Nova :

En tu-all d’ar vogerad a varshallioù emañ Brieg Guervenno. Kaner metal pe « prog » e oa e penn-kentañ ha tamm-ha-tamm emañ eñ o cheñch tu. Elektronikoc’h eo marteze mui ur seurt liv « crooner » warnañ. Hag amañ ivez e teu brav gantañ ! Brav-kenañ zoken ! Selaouit « Hebiou din » da skouer :

Quenquis, eus he zu, a gendalc’h gant he erv elektronek dezhi ha n’eo ket fall tamm ebet. M’he defe kendalc’het gant ar saozneg pe kane dindan an anv Tiny Feet marteze e vefe klevet anezhi noz-deiz war FIP hogen dibabet he deus ar brezhoneg (hag a-wechoù e ra kanaouennoù gant kanerezed eus Bro-Gembre ouzhpenn) hag e ra enor d’hor yezh !

Evel just ne soñj ket an arzourien-se eveldomp, darn anezhe a zo gaochisted eus an tu-pellañ zoken met ne reomp ket foutr, n’omp ket ni dalc’het gant spered berr ha kloz Frañs Inter pe Les Inrocks da skouer. Ar ganerien-se o deus un talant kaer hag an dra-se an hini eo a gont.

Ma vefe kotaioù a vuzik e brezhoneg (pe e gallaoueg ma’z eus arzourien a gan en eil yezh breizhad-se) war an holl radioioù arc’hantaet gant ar Vretoned e vefe normal. Dav eo sikour an arzourien-se, meritañ a reont !

S.D.

Foto : tapadenn skramm Krismenn

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.