Disadorn dremenet e oa tolpet un hanter-kant a dud e La Boulaye e Porzh-Pêr ur gumun eus Bro-Retz evit adsevel kroaz ar gêriadenn. « Diskaret e oa bet gant ar foeltr » eme Godefroy Riou du Cosquer « ha tud a vez o tremen ingal war an hent o doa lavaret deomp e oa arruet poent hi adsavel ». Setu ar pezh a zo bet graet gant ar gevredigezh SOS Calvaires 44. Fromus e voe al lid : daou veleg o deus benniget ar groaz ha kanet kanaouennoù kristen dirak pevar marc’heg war bennoù o daoulin mui un tropellad a dud leun a feiz. Eus ur gompagnunezh behour, ur sport eus ar c’hrenn-amzer, e oa ar pevar marc’heg houarnwisket penn-kill-ha-troad. Graet o deus un abadenn da c’houde da lakaat an dud d’ober anaoudegezh gant o sport.
Ur bagad a sonnas tonioù ar vro a-hed ar beurevezh kement ha reiñ kalon d’al labourerien. Kanet eo bet ar Bro Gozh Ma Zadoù war an ton bras gant an dud o tougen bannieloù Breizh a bep seurt (ur banniel gall a oa ivez).
Setu un devezh breizhad ha kristen kaset gant reoù hag a oar : Godefroy Riou du Cosquer hag e skipailh ! Kentañ gwech e adsav SOS Calvaire 44 ur groaz penn-da-benn. Abaoe bloaz e pleustras kentoc’h ar gevredigezh war difraostañ tro-war-dro kroazioù zo pe adkempenn reoù e stad fall. Arc’hantaet eo bet kroaz La Boulaye penn-da-benn gant ar gevredigezh ha tud a roas o skod hag adsavet eo bet gant asant perc’henn an tamm douar.
Photo d’illustration : DR
[cc] BREIZH-INFO.com, 2021, dépêches libres de copie et de diffusion sous réserve de mention et de lien vers la source d’origine
