Goude ar gouelioù, ur banne Kefir bemdez evit kavout ar yec’hed

Dre un taol degouezh eo ‘m eus klevet kaoz eus ar C’hefir. Un amezegez din he doa profet din greunennoù. Ur sac’hadig e oa. Hag hi o lâr’ din dre chuchumuchu « greunennoù kefir eo ».

Kefir ? Met petra eo ar c’hefir-mañ a soñjis war an taol.

Hervez Wikipedia ez eo ar c’hefir ur boeson kozh-rejis. Met graet e vez muioc’h-muiañ ganti bremañ evit kavout ar yec’hed goude ur barrad kleñved da skouer.

Aes eo da fardañ. Natur eo dezhi da c’hoañ. Bouilhañ a ra ha fresk eo.

Deus menezioù ar C’haokaz e teu ar C’hefir. Evit pobloù ar C’haokaz, muzulmaned al lodenn vrasañ anezho, eo ar C’hefir « greunennoù ar Profed ». Tamm ha tamm en em strewas madoberioù ar C’hefir e Rusia ha neuze e Europa ar Reter ha bremañ en Europa a-bezh ha betek e Stadoù-Unanet m’eo deuet da vezañ ur boeson « diouzh ar c’hiz ».

Ar pezh a zo estonus gant ar c’hefir eo e c’hreunennoù. E gwirionez n’eo ket greunennoù, mikroboù ne lavaran ket. Ha boazet e oa an dud da reiñ ar « greunennoù »-mañ d’an amezeien, d’ar vignoned evit ma c’hellfent fardañ o c’hefir dezhe.

Daou zoare kefir a zo :

• kefir laezh
• kefir go pe kefir frouezh

Evit ar re ha ne dreizhont ket al laezh eo gwelloc’h fardañ kefir go pe frouezh, anat eo.

Setu ur rekipe evit fardañ kefir frouezh :

• Ul litrad dour (hep klor)
• Daou pe tri loaiad soubenn a c’hreunennoù kefir frouezh
• Daou pe tri loaiad soubenn sukr
• Ur figez sec’h
• Un dailhenn sitroñs

Lakaat dour e-barzh ur pod gwer. Lakaat ar sukr war c’horre ha meskañ. Ha neuze lakaat ar greunennoù kefir, ar figez hag ar sitroñs. Lakaat ur tamm lienn war c’horre. Ne faotañ ket e vefe peurstank ouzh an aer. Lakaat e go e-pad 24-48 eurvezh. P’emañ ar figez hag ar sitroñs o tont war-c’horre gant bouilhouigoù e talv eo prest ar c’hefir. Bremañ eo poent silañ ar boeson (evit adkavout ar greunennoù, ar figez hag ar sitroñs) evit kaout ur boeson mat da evañ. Moaien zo lakaat anezhi er yennerez evit ma vefe fresk da vat.

Arabat ober gant ostilhoù metal !

Ar c’hefir a zo mat evit ar yec’hed : Evit koazhañ da gentañ holl kar leun a brobiotikoù eo. Gantañ e vez kreñvaet ar reizhiad immunekaat ivez hag ur vamenn a vitaminoù ha meinennoù eo (vitaminoù ar strollad B, kalsiom hag eneboksiderioù). Ha kalz gwelloc’h eo eget ar sodaioù evit ar re dik gant ar C’hoka pe ar Sprite da skouer kar n’eus ket kalz a sukr ennañ. Ha bouilhoù a zo e-barzh !

Goude ar gouelioù, soñjit mat er C’hefir evit kavout ar yec’hed !

Eliza Fonteilles

Illustration : DR
[cc] Article relu et corrigé (orthographe, syntaxe) par ChatGPT.

Breizh-info.com, 2025, dépêches libres de copie et de diffusion sous réserve de mention et de lien vers la source d’origine..