Korsiz : ar wazed diwezhañ ? Hag ar Vretoned ?

Muioc’h-mui e weler war ar rouedadoù sokial videoioù pe « memoù » ma vez prezantet Korsiz evel gwir wazed, paotred kastret-mat, « paotred añtie » evel ma veze lavaret e Bro-Dreger gwechall.

Er c’hontrol, muioc’h-mui e vez prezantet ar Vretoned evel gaochisted, tud wok mod Roazhon 2. N’eus ket nemet ar besketaerien a vez gwelet c’hoazh evel gwir baotred. Evit ar peurrest eus ar vro, ni zo ni kontet da bennoù boeson, gaochisted daonet ha punked o chas bastardet eus Roazhon evit ar C’hallaoued. Gant ar vezh ! Echu eo gant simbol ar Breizhad pennek, bremañ ni zo Breizhiz wokist.

Ha n’eo ket gant hor broadelourien a vo cheñchet ar skeudenn-mañ. Tra ma vez gwelet ar vroadelourien korsad evel soudarded ar strouez prest atav da zifoupañ ur bistolenn bennak, an « emrenerien » breizhad a vez gwelet evel gaochisted, paotred bresk tañset gant merc’hed feminist. Paotred spazhet rediet d’ober pinijenn evit tra-mañ-tra e strolladoù broadelour renet gant Big Mama bremañ ha n’eo ket gant louarned kozh evel gwechall.

Na vezhus e oa bet ar reportajoù war Gouel Broadel ar Brezhoneg pa oa c’hoazh e Langoned da skouer. Stal « Gast » ma c’helle ar vugale gwelet fotoioù elligoù pe standoù ar strolladoù « dizalc’hour » eus an tu-kleiz pellañ gant bannieloù LGBT. Biskoazh ne vefe gwelet seurt tra e Korsika da skouer !

Piv bennak en defe c’hoant da emezeliñ e seurt strolladoù ha da ouestlañ e vuhez d’ar stourm-mañ ? Meskañ ar Palestin, an LGBT, ar feminism hag ar stourm evit Breizh, evit ar brezhoneg, ar gallaoueg evit an neb a gar, nann, tout-se ne’z a ket asambles. Ar stourm evit ar justis sokial hag ar stourm evit Breizh, ne lavaran ket. Met bremañ n’eus ket mui anv eus-se gant strolladoù an Emsav, « ar sokial », ar stourm evit ar Palestin, « ar gwirioù » hag « a-enep ar fachism » o deus kemeret tout ar plas.

Neuze, e broioù ar c’hornôg hag e vefe Korsiz ar wazed diwezhañ ? Er metoù broadelour korsad ez eus ivez ur seurt wokism, dreist-holl evit ar pezh a sell ouzh an enbroerezh met solud eo ar chaoserioù c’hoazh ha n’eo ket warc’hoazh e vo paotred gwisket gant sae e manifestadegoù ar strolladoù broadelour korsad. E Breizh, an holl chaoserioù a zo bet toullet ha kouezhet en o foull memes. An UDB yaouank da skouer zo deuet da vezañ pimpatrom an « Emsav nevez »-se

Gant ma vo ur rummad nevesoc’h choazh a emsaverien hag a cheñcho an traoù un deiz bennak !

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.