E Korsika e oa gwelet mat rektor an Deskadurezh-Stad Rémi-François Paolini. Paotr ar vro e oa eñ. Gouzout a rae korseg. Komz a rae korseg p’en doa tro d’hen ober. Klasket en doa kas war-raok ar skolioù e korseg dre soubidigezh ha graet en deus e seizh gwellañ evit saveteiñ ar skolioù bihan diwar ar maez. E miz du 2025 en doa klasket ar minister kas ar rektor an diaoul oar pelec’h, en ur plakard bennak surawalc’h, kar dija d’ar mare-se e oa ar jakobinerezh o klask « adlakaat an traoù en o reizh » (poz dezhe). Dleout a reas ar vroadelourien sevel o mouezh evit ma chomfe d’e blas.
Ich ! Ar wezh-mañ ar jakobinerezh eus Paris he deus bet e lêr : e kuzul ar ministroù zo bet divizet ramplasiñ anezhañ d’al lun 27 a viz gouere. Ur vaouez Nathalie Mons, rektorez ar Martinik betek-henn, a gemero e blas.
Kaset en deus Rémi-François Paolini ur gemenadenn gant gerioù e korseg enni evit kelaouiñ tud Korsika.
Gantañ oa bet roet lañs da Scola 2030, ar steuñv evit kas war-raok kelenn ar c’horseg er skolioù, ar skolioù dre soubidigezh da gentañ.
Evel just eo bet « diskaret » gant ar rouedadoù jakobin, mignoned Jean-Michel Blanquer da skouer, a zo o vreinañ ar velestradurezh-uhel publik. E Bro-C’hall eo jakobin ar « Stad don ». Ur poezon evit ar pobloù hag ar yezhoù minorelaet !
Chañs vat d’ar rektorez nevez kar n’eo ket sur e c’hallo distrujañ ar pezh a zo bet lakaet e plas gant Rémi-François Paolini.
C’hwec’h miz a-raok fin prantad Macron en Elysée e oa marteze traoù all d’ober e Korsika. Peurvotiñ ha lakaat e pleustr ar statud emrenerezh evit an enezenn hag a zo erruet er Sened da skouer.
[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.
Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.
