E Toulon, en Okitania, e vo aozet skol-veur hañv R&PS, ar bloaz-mañ, da lavaret eo Rannvrioù ha Pobloù Kengred, hag a zo UDB e skour e Breizh. Etre ar 26 hag an 29 a viz eost e vo dalc’het ar skol-veur hañv-mañ. Dibabet ez eus bet ul lugan diouzh ar c’hiz ar bloaz-mañ : « Yec’hed, ekonomiezh, font : evit talañ ouzh an enkadenn sistemek, cheñch ar vonreizh ha dibab ar gevreadelezh ».
« Yec’hed » : anat d’an holl ez eus anv amañ d’ar C’hovid ha d’ar stad ha n’eo ket bet gouest da verañ mat an traoù. Er c’hontrol, ar rannvroioù a zo bet kalz efedusoc’h eget ar melestradur jakobin.
« Font » : anv zo eus prizioù an tiez o kreskiñ abominabl e Breizh (gwelet levr Nil Caouissin war ar sujed) met ivez e Bro-Euskadi hag e Korsika. Nil Caouissin eus an UDB a zo bet pedet d’ober ur brezegenn war an tem-se justawalc’h.
Dre ma vo aozet an emvod-meur gant ar Partit Occitan hag « Oui La Provence » ar bloaz-mañ e vo kaoz eus ar Provañs hag eus Okitania a-bezh evel just. Ur rentañ-kont a vo graet eus ar c’houlzad : « Ni Sud Ni PACA, mais Provence. Rendons son nom à notre région » (muioc’h eget 35 000 sin a zo bet rastellaet gant ar petision dija). Lakaet e vo ar gaoz war ar c’hoariva en okitanek ivez ha forzh traoù all…
Ruz pe ruz-tan (mui un tamm glas marteze) eo an holl strolladoù a za d’ober R&PS met n’eo ket ur souezh : abaoe 50 vloaz petra o deus graet ar strolladoù eus an tu-dehou war tachenn ar pobloù hep stad ? Leusket o deus tout ar plas d’ar c’haochisted. Arruet eo poent cheñch penn d’ar vazh ! E Breizh ez eus anv da sevel ur strollad emrener eus an tu-dehou (Volontaires pour la Bretagne) da skouer. Tremen poent e oa !
Crédit photos : DR
[cc] Breizh-info.com, 2021, dépêches libres de copie et de diffusion sous réserve de mention et de lien vers la source d’origine
