Yvon Bourlès en deus lañset ur chadenn Youtube e brezhoneg penn-da-benn daou viz zo. Warni e kinnig Yvon Bourlès sujedoù a bep seurt : ar c’harbon 14, al lin e korn-bro ar Menez Are, arnodennoù evit diskouezh eo skiantel troioù-lavar zo e brezhoneg, traoù fentus, …
Paotr Roazhon zo kelenner war ar matematikoù ha war ar “Bharata-Natyam”, ur seurt dañs eus India. War-se e kinnig ivez kentelioù dañs India war e chadenn. Ha gwisket mod bro-India mar-plij ! Biskoazh gwelet seurt traoù en a-raok en hor yezh ! Un tamm istrogell a zen eo Yvon Bourlès a-wechoù met an neb a blij dezhañ seurt aergelc’h a gavo e lod, sur !
