« Faisons Bretagne » : unan all pe an hini mat ?

Embannet eo bet n’eus ket pell zo gant ar c’hannad Paul Molac e vo savet « Faisons Bretagne ». Ur strollad politikel nevez. Ha gant ar strollad nevez-mañ e fell da baotr Ploervael stourm evit Breizh emren.

N’eo ket Breizh-Info a vo spontet gant ur strollad emrenour, anat deoc’h.

Met strolladoù emrenour all a zo e Breizh dija : an UDB ha Strollad Breizh (broadelour evit ar Strollad Breizh a-hervez). Unan zo eus an tu-kleiz hag egile eus an tu-dehou.

Ha hini ebet n’en deus an disterañ levezon bennak war ar vuhez bolitikel. An daou a zo « strapontisted » anezho : an hini kentañ war al listennoù eus an tu-kleiz gall hag an eil war al listennoù eus an tu-dehou.

Paul Molac a zo bet dilennet, ar wezh kentañ, evel « distag diouzh forzh peseurt strollad politikel » met « mignon d’an UDB » memestra. Meur a wezh en deus lavaret petra a soñje eus an UDB goude-se met kenderc’hel a ra da labourat gant ar strollad memestra. E genlabourer er parlamant Victor Gallou a zo ezel pe bet ezel eus an UDB, da skouer, bet war ar renk evit ar Parti memes. Ha drol e vefe en defe cheñchet tu.

Lavaret en deus Paul Molac e vefe « Faisons Bretagne » eus an tu-kreiz-kleiz « evel m’emañ ar Vretoned » emezañ. Ma ! Er bolitikerezh n’eo ket an traoù evel m’emaint er momed M. a gont met an tuadurioù. Hag a zeiz da zeiz ez eus nebeutoc’h-nebeutañ a dud eus an tu-kleiz e Breizh ha muioc’h-mui a dud eu an tu-dehou. Tu-dehou-dehou ha n’eo ket tu-dehou pellañ. Hogen, bremañ an RN a zo deuet da vezañ ur meskaj etre an RPR gaullist eus ar bloavezhioù 80 hag ar PCF mod Marchais evit ar pezh a denn d’ar sokial ha n’eo ket eus an tu-dehou pellañ tamm ebet.

Met petra eo an « tu-kreiz-kleiz » evit Paul Molac ? Ur genlabourerez dezhañ, Laurine Orêve a oa kenlabourerezh evit ar strollad UDB-Tu kleiz keodedour-Ar Re C’hlas er gumuniezh-kumunioù Sant-Brieg Armor a-raok. Eus an tu-kreiz-kleiz eo, neuze, seurt PS ekolo adlivet e Gwenn-ha-du ? Arruet eo skuizh ar Vretoned gant se ‘m eus aon. Ma fell da Baul Molac mont gant an hent-se e vo un hent-dall a-dra sur, re-bar dur seurt « Frankiz Breizh » eus ar bloavezhioù 2020.

Gwir eo eo anavezet Paul Molac e Breizh ha brud vat gantañ partout abaoe e lezenn. Met petra a vo propozet gantañ hag a vo disheñvel-mik diouzh ar re all. Kristian Troadec en doa savet an MBP, eus an tu-kleiz-kreiz eñ ivez. Pelec’h emañ an MBP bremañ ? Ha « Oui la Bretagne » da c’houde ? Ha « Nous te ferons Bretagne » ? Ha pegen emsavioù berrbad all ?

N’eo ket ar strollad a zo diaes da sevel. Tri da seniñ ha daou da zañsal ha dao, partiet ar fest-noz ! Al linenn bolitikel hag a blijo d’ar Vretoned an hini eo a zo diaes da gavout. Ha diouzh ar pezh a wellomp bremañ, diouzh penaos emañ an ergelc’h politikel e Bro-C’hall e c’hellfe ober berzh ur strollad politikel emrenour eus an tu-kreiz-kleiz ya MET unan mod Danemark, da lavaret eo a-enep an enbroerezh. A-enep ar Ramplasiñ Meur. Amañ emañ ar gwir linenn frailh bremañ : piv zo evit ar Ramplasiñ Meur ha piv n’eo ket. Hag an dud, ar Vretoned evel ar re all, a vot evit se ha n’eo ket mui evit traoù all, ken stegn emañ an traoù pa vez kont eus an enbroerezh.

Petra a lavaro Paul Molac war an dalc’h-se : « arabat stigmatizañ, padamalgam, harz d’ar fachisted » me ‘bari. Setu amañ emañ an hent dall. Ne barifen ket ur blank war e strollad nevez a seurt se rak unan a zo dija evel se hag unan kozh, gantañ ur mekanik politikel : an UDB an hini eo mui ur bruzhunadur a strolladoù all eus an tu-kleiz pellañ. War-se perak sevel unan nevez hag a lavaro ar memes tra hag ar re all ?

Gwelet e vo petra a vo propozet gant Paul Molac met aon ‘m eus e vefe Faisons Bretagne ur « strollad all » ha n’eo ket « an hini mat » c’hoazh.

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.