Pour ha triñchon evit superterion Mélenchon eus an Emsav goude prezegenn Brekilien

Treñket eo ar soubenn en Emsav goude prezegenn Mélenchon dirak 2000 gaochist e Brekilien d’ar 14 a a viz gouere.

Sklaer eo bet ar milioner ruz aze : Beuzet e vo Breizh en un « eko-rannvro » hag a yay betek Saint-Etienne ma ya an tu-gounit gantañ er votadegoù a zeu; dre-se, evel just ne vo ket adunvanet Breizh. En Emsav e oa kalz tud prest da heuliañ LFI evit ar votadegoù prezidant ha pour ha triñchon o deus bet ar wech-mañ ! Ne vern, lod a choazo da heuliañ ar pardon memestra pa vo komañset evit gwir ar c’houlzad-kabaliñ.

Breizhad int sur met kleizour int da gentañ !

Hoalet e oa bet gaochisted an Emsav gant ar pezh en doa lavaret LFI diwar-benn Korsika ha Kaledonia-Nevez. An enezenn gentañ he do ur statud a emrenerezh e kenkas ma vez dilennet Mélenchon e miz ebrel hag eben a vo lakaet dizalc’h diouzh Bro-Frañs en ur spered « didrevadennour ».

War-se e krede ar gaochisted e vefe « astennet » ar bolitikerezh-mañ da Vreizh. E gwirionez ne vo ket cheñchet tra evidomp. Geo ! Ne vo ket mui eus Breizh.

Arabat huñvreal ! Ar POI a zo e penn ar stur e-barzh LFI, da lavaret ar strollad jakobinañ eus an tu-kleiz pellañ. Dre guzh evel just kar trotskisted int. Hag ar pezh a dalv evit Korsika pe Kaledonia-Nevez diwar abegoù didrevannour ne dalvo ket evit Breizh, se zo sur. Ar re-se a zo politikerien pragmatek ha kinek : ma vez gounezet muioc’h a vouezhioù e Korsika int prest da reiñ ar pezh o deus c’hoant d’ar vroadelourien korsad gant ma c’halvint da votiñ evit Mélenchon d’an eil tro.

E Breizh, n’eo ket kreñv a-walc’h an Emsav ha n’en deus pouez ebet ar votadegoù. Adunvaniñ Breizh ? Er « c’hartcherioù » kollet eus Roazhon pe Naoned n’o deus ket foutr kaer eus se ha Mélenchon hen oar mat. N’eus netra da grignaat er c’hartcherioù evitañ gant seurt reklem.

Met arabat mourc’hoarziñ en tu-all d’ar rubikoñ. Petra vo graet evit Breizh gant an RN pa vo e Matignon hag en Elysée ? Araoket he deus Marine Le Pen diwar-benn emrenerezh Korsika met hag eo prest da vezañ ken « araokour » evit Breizh ? Anv zo atav da abolisañ ar rannvroioù e-barzh program an RN. Ha graet e vo a-benn ar fin ?

Arabat en em douellañ gant ar RN : tud zo a zo jirondin hag o deus c’hoant difenn Breizh, he yezhoù hag e sevenadur, tud emrenour a zo memes met ur gwir lobby jakobin penn-kil-ha-troad a zo ivez. Peseurt tu a vo e penn ar stur e miz ebrel ma vez gounezet gant Marine ?

Ar gaochisted a zo techet da grediñ en o huñvreoù gant Mélenchon met ni ivez a zo techet d’en em douellañ gant Marine diwar-benn aferioù Breizh. Bezomp war evezh ha kendalc’homp da zifenn troad ouzh troad mennad Breizh emren er metoù « patrioted » (gall, sik). Mignoned hon eus e-barzh. E strollad Ciotti da skouer e hañvalomp bezañ kalz digor o spered war se.

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.