C’hwezh ar votadegoù rannvro a zo gant an Emsav er mare-mañ. Goude Paul Molac hag en deus embannet e vo savet e strollad politikel dezhañ, an UDB az a war ar renk evit ar rak-votadeg eus an tu-kleiz, emañ Kristian Troadec o seniñ ar c’hloc’h ! D’an 20 a viz even e vo gouel an otonomisted e Karaez (er Glenmor) gant « an tolpadeg evit komz eus an emrenerezh » aozet gant maer Karaez asambles gant Yvon Ollivier ha Philippe Guillemot, kuzulier departamant Penn-ar-Bed !
Hervez Kristian Troadec e vo komzet « eus ar votadegoù kannad hag ar votadegoù rannvro a zeu » an deiz-mañ. Evel just !
Paul Molac en deus prouet e oa moaien bezañ dilennet er parlamant evel emrenour ha reoù all a vefe prest da zispenn e roudoù. Troadec K da skouer er c’hwec’hvet eus Penn-ar-Bed e plas Mélanie Thomin ? Bremañ, dre m’emañ e enebour kozh Richard Ferrand er C’huzul Bonreizh e c’hellfe paotr Karaez ober e doull.
Met ar votadegoù-rannvro dreist-holl a zo e spered an otonomisted. Loïg Chesnais-Girard az aio war ar renk en-dro evel just met dav e vo dezhañ kavout mignoned, « kevelerien » ha plijout a rafe d’an otonomisted (« eus an tu-kleiz » anat) bezañ an hini a lak ar roue war e gador. Siwazh, evel boaz e fello d’an UDB kemer penn an afer hag evel boaz e vo graet kazeg. Pe, ne vo ket moaien ober emglev gant an UDB ha div pe teir listen « breizhad » az aio war ar renk.
Ha disoc’hoù dister a vo e penn an hent. D’an nebeutañ, d’an 20 a viz even e vo « divizet » e Karaez.
[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.
Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.
5 réponses à “D’an 20 a viz even e vo « gouel an otonomisted » e Karaez”
Ha Paol pelec’h vo? O sinañ ur Garta?
Christian Troadec ne c’hell ket bout dilennet. Hennezh en deus kalz a aferioù stag ouzh e revr gant ar boeson, aferioù hudur, kunujenniñ an dud…. Dija, nebeutoc’h-nebeutañ a dud a vouezh evitañ ha dilennet eo bet in extremis e Karaez evel maer. Neuze war an tolpad, ar geodedourion ne reont ket forzh anezhañ. Emañ oc’h ober e dalaroù evel politikour ha gwell-a-se !
War an tolpad-se ez eus tud kalz barrekoc’h ha naetoc’h o skeudenn egetañ. Lod zo oc’h ober ul labour dispar hag emerenerion anezho, mui pe vui, evel Dominique Cap e Plougastell-Daoulaz, da skouer.
Dominique Cap a vije emrenour ‘mit hu ?
Biskoazh kement all, pevar lagad d’ar marc’h dall !
E penn kevredigezh maered Penn ar bed eo (e oa ?) : ne gredan ket e vije bet roet ar garg se dezhañ ma vije bet emrenour.
A vec’h ma oar un tammig brezhoneg du-mañ ha setu aze toud : mat evit rastellat mouezhioù ar re gozh.
Ned eo ket dav bout emezelet en ur strollad brezhon evit bout emrenour, Gwilhmod !
Meur a elfenn zo : hennezh a wel Jean-Yves Cozan evel e ventor, embann a ra fraezh e c’hoant da broduiñ tredan war gumun Plougastell-Daoulaz a-benn bout emren, komz a ra brezhoneg ha muioc’h eget pezh a hañvalit lakaat da c’houglevout, difenn a ra pouez maered Breizh (ha neket Penn-ar-Bed eo hepken)…
Evit gwir, muioc’h-mui e vez intret politikourion Breizh gant ar c’hoant da gaout muioc’h a emrenerezh evit dibab pezh a vo graet gant an tailhoù hag an taosoù e Breizh, difenn pezh zo dibar dimp — sevenadur hag all —…betek un den evel Chesnais-Girard er C’huzul-Rannvro !
Kement-se zo un hent etre ar rannvroelouriezh habask ha diefedus a oa o ren gwezhall hag an emrenerezh rik gant mennozh ur Stad vrezhon. Hogen, tamm-ha-tamm e vez graet e vragoù da Yann, neketa ?
Estroc’h eget emezelañ en UDB pe PB a c’haller ober evit bout a-du gant an emrenerezh — ha meur a bazenn dezhi —.
C’hoant ‘m eus da ouzhpennañ ivez en deus Dominique Cap lakaet e gumun a Blougastell-Daoulaz da sinañ live 4 ar garta « Ya d’ar brezhoneg », gant bezañs Paol Molac. Labouret en deus evit ma vefe lakaet hon yezh war wel en embregerezhioù ivez, evel e Ti-Leclerc peurgetket.
Neuze, ya, labourat evel se zo bout emrenour.