An Durbal, Pornizhan, Sant-Mikael Keveger, Gwerzhav, Goueled-Goulen, niverus eo ar c’hêrioù eus Liger-Atlantel m’he deus graet he reuz ar vandennad-mañ. Tri den. An tad lesanvet « Al Pacino », ar mab hag an niz/kenderv (« boesonour ha drammet » hervezañ). Pep hini a zo bet kondaonet 20 wech d’an nebeutañ dija. Termajied int, o vevañ tro Naoned.
E kreiz 2022 ez aent da welet tud kozh eus Bro-Naoned, gwisket evel poliserien, gant kartenn-vicher, brec’henn hag all. Goulenn a raent ganto ma oa bet laeret traoù diganto ha, tra ma veze ar re gozh o kontañ o bravigoù, e raent o fri-furch en ti, ur sac’h en o dorn. Kirri-tan a zo laeret ivez, digant tud kozh atav !
D’an 11 a viz eost e lammas an tri faotr gant ur vaouez a 83 vloaz evit laerañ ur maen-prizius hag un dro-goûg diganti.
A-benn ar fin e vint tapet gant ar boliserien goude ul laeradenn ouzhpenn. A-hed an imbourc’h e klaskas an tri forban c’hoari ar re sot, evit bezañ kaset d’un ospital psikiatrek. « Al Pacino » a’n em bisas warnañ tra ma oa aterset gant ar barner zoken. En aner. Hervez ar vedisinerien, n’eo ket skañv o spered.
D’ar c’hentañ a viz meurzh int bet kondaonet da bemp bloaz a doull-bac’h gant lez-varn Naoned.
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
