Gwezhall e veze anavezet kae ar foz e Naoned evel ur c’harter « tomm ». Karter ar vartoloded hag ar gisti, karter an dokerien hag an houlierien. Nepell eus karter Sainte-Anne ha Chantenay. Kar kalz eus ar re-se, ar gisti evel an dokerien, a oa Breizhizeliz « deuet da Naoned a-raok bezañ daonet » e-giz veze lavaret.
« Paotred kreiz an tachenn » (ar « Milieu ») a oa e tout an hent gante e kae ar foz. Int a oa « ispisializet », troet war ar « merc’hed », ar gisti. E Naoned e oa merc’hed a « laboure » evite met e Sant-Nazer, An Oriant ha Brest e oa memes mod. Hag en holl borzhioù eus Breizh o doa aon tud ar vro rak « an Naonediz » pe « paotred Naoned » hag a oa mestr war ar gistierezh. N’eo ket dre zegouezh eo bet choazet an anv Lulu la Nantaise gant Georges Lautner evit e film mil-brudet « Les Tontons Flingueurs » da skouer.
Abaoe en deus cheñchet kalz an traoù e kae ar foz. Ur mafia nevez a zo mestr war borzh al Liger bremañ. Ha ganti zo erruet an dramm.
Ar straedoù etre kae ar foz ha plasenn ar bours zo deuet da vezañ « Kêr Strinkell« . Skwatoù, strinkelloù, pipoù krak, ar pennoù-dramm oc’h en em gannañ noz-deiz, setu ar pezh a weler er c’harter. Hag erruet skuizh ar goñversanted gant se. Evel just ne ra netra an ti-kêr. N’en deus ket c’hoant klevet anv eus se zoken kar ne ya ket gant e « dro-spered gaochist » Setu perak o deus lañset ar goñversanted ur petision. N’eo ket ur petision en-linenn evel ar re all, ur gwir betision mod-kozh ma c’hell an dud sinañ anezhi ne lavaran ket.
Mod-se ha gant an trouz mediatek a ya ganti e kred ar goñversanted sachañ evezh Johanna Rolland, maerez Naoned.
N’eo ket sur e vint klevet siwazh. Kar an tu-kleiz a zo e penn an ti-kêr e Naoned hag en em soursial a ra kentoc’h eus ar « jener », an LGBT pe ar « ouennelouriezh » eget problemoù ar goñversanted hag an aferioù dramm ha fuzuilhadegoù.
Ur gêr gollet eo deuet da vezañ Naoned ‘m eus aon. E Naoned e vezer daonet bremañ ha n’eo ket ar c’hontrol eo.
[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.
Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.
