Erge-ar-mor (22) : echu gant baradoz Caroual

Ur baradoz eo Erge-ar-Mor e arvor ar Penterv. An holl o deus rouzet war traezhenn Caroual a oar pegen brav eo ar gweledva tro-dro. Breizh ar c’hartennoù post !

Hogen, abaoe m’o deus kroget labourioù ar rodoù-avel offshore eus bae Sant-Brieg, aet eo ar baradoz da ifern evit tud ar vro. Er mor ne vez ket mui gwelet ar bigi pesketa o tremen pe ar bigi dre lien o loveal trankilik. En o flas e vez gwelet bigi chantieroù ar rodoù-avel. Ha trouz ganto ! Ken n’hall ket kousket ken annezidi zo, dreist-holl pa vez digoret ar prinistri. Ha gant an tommder an hañv-mañ, n’halle ket an dud ober mod-all ! A-nes komz eus flaer an eoul-maen !

Gant ar bigi e vez graet trouz rak labourat a reont noz-deiz met estreget saotradur an trouz hag ar flaer a zeu ganto, saotradur ar gouloù a zo ivez kar implij a reont penngouloù greantel ivez. Hag a-wechoù e tremen ar skinoù a-dreuz prinistri an tiez. E kreiz an noz o deus an dud ar santimant da welet daou pe dri heol o parañ warno ! Moaien e vefe da rouzañ e kreiz an noz, hervez kont.

Hag estreget er mor e vez graet labourioù. War parkva an draezhenn ez eus tud o labourat ivez, ken e krenn an tiez tro-dro deizioù zo. E miz eost, aotreet e oa bet al labourerien da labourat d’ar sul war ar marc’had, hag an devezhioù vak zoken ! E kenkas ma vefe fall an amzer ar goañv-mañ e kemeront lañs. Hag an Arvoriz barradoù digousk…

Ne ouzer ket hag ekologour e vo an tredan produet gant ar rodoù-avel-mañ, da nebeutañ n’eo ket bet ekologour ar chanter evit o staliañ !

[cc] Breizh-info.com, 2022, dépêches libres de copie et de diffusion sous réserve de mention et de lien vers la source d’origine