… Gant Hervé ar Beg eo aet ar priz Zavier de Langleiz 2023 ! Disul dremenet eo bet embannet anv an tregeriad, paotr Arvorig FM, evit e levr « Amiraled Kab Horn *». D’an 29 a viz here e vo roet dezhañ da geñver Saloñs al Levrioù eus Karaez.
« E miz Genver 1905 en em gavas Loeiz e ti Darig, ur minor c’hoazh, a oa o chom e-tal kichen Landreger gant e dud en un ti-feurm. Deuet e oa da c’houlenn gant Darig ha kontant e vije da vont gantañ da Naoned, “Da vont hon-daou asambles gant ur c’habhorner d’an Amerik,” emezañ. Pemp miz goude e lestras Darig evel novis ha Loeiz evel martolod e-bourzh an teirgwern Leon XIII e Naoned.
Al lestr az ae da Abertawe e Kembre da gerc’hat ur c’hargad glaou da gas da San Francisco.
E-pad an daou vloavezh en deus tremenet o kas marc’hadourezh eus un eil porzh d’egile en deus gouzañvet Darig buhez kalet an dud a vor, met war an dro en deus dizoloet ivez ar garantez ha broioù disheñvel a-grenn eus e hini.
Ma’z eo bet savet tudenn Darig diwar faltazi ar skrivagner, ar braz eus merdeadennoù al Leon XIII zo bet anezho e gwirionez. »
Un emsaver dizalc’hour eo Hervé ar Beg. Bet e penn Combat Breton kazetenn Emgann e-pad pell ha neuze paotr ar mikro war Arvorig FM e Landerne betek 2018.
E 2018 e oa bet erminiget gant Skol Uhel ar Vro.
* An Alarc’h 11€
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
