Degouezh ar Redadeg e Naoned : petra o deus gwelet Naonediz ?

Setu ! Degouezhet eo ar Redadeg e Naoned goude kilometradoù dre hentoù Breizh. C’hoarzhadegoù e-leizh, tud eürus, bugale o virvilh gant ar c’hoant redek, tud o vrezhonegañ er c’hamion, war bord an hent, er steudadoù a dud a zo bet o redek war-lerc’h ar vazh.

Ha c’hoazh ar bloaz-mañ, eo tremenet mat an holl draoù. Ur skipailh aozañ a-zoare, sirius, « pro » da vat. Gourc’hemennoù dezhe !

Ar Redadeg a zo degouezhet e Naoned d’ar sadorn d’enderv hag an holl a oar pegen « simbolek » eo ar gêr-mañ evit ar Redadeg, evit ar Vretoned.

Met petra o deus gwelet Naonediz ? Kantadoù a dud, pep a vanniel gwenn-ha-du o redek, mousc’hoarzhus ha pozitivel hag o lavarout « Naoned e Breizh » ?

N’eo ket se o deus gwelet.

Gwelet o deus kantadoù a dud, o redek, mousc’hoarzhus ha pozitivel hag o huchal « Ar vro, ar yezh hag ar frankiz » hag ur bern traoù all.

Met dre ma oa e brezhoneg al luganioù, n’o deus komprenet seurt 99,9999% eus tud Naoned. Ma vefe lavaret dezhe eo Norvejeg o defe lavaret « ah ok ».

An doare gwellañ d’ober eus ar Redadeg un darvoud « breizhad » a vefe bet da lakaat ur mor a Wenn-ha-du o tibunañ neuze. Aze e vefe bet komprenet gant tout an dud e oa BREIZHIZ o redek e NAONED. Ha, dre-se, e vefe bet lakaet war-wel d’an holl ar stourm evit Breizh adunvanet.

Met, n’eo ket se o deus gwelet Naonediz disadorn.

Dek Gwenn-ha-du d’ar muiañ tout

Gwelet o deus ur c’hant bennak a dud o redek gant meur a vanniel disheñvel : ar Gwenn-ha-du evel just, an hini kentañ e oa memestra. Met goude-se o deus gwelet

• bannieloù ruz,
• ur banniel euskarad (hag ur banniel navaran memes),
• bannieloù AEK Korrika,
• ur banniel okitan,
• bannieloù « repuidi deuet mat »,
• bannieloù ruz « Breizh enep-faskour »,
• banielloù Breizh ma oa ur steredenn ruz e-plas an erminigoù,
• Unan ma oa bet lakaet al liv LGBT e-plas ar bandennoù du
• bannieloù strolladoù politikel eus an tu-kleiz pellañ,
• ur banniel « termajied »,
• ur banniel Diwan pe zaou
• ur banniel « Div Yezh » pe zaou
• Ha geo ! Gwelet o deus ivez Black Blockoù « breizhad » o tougen ur giton. Gwisket e du, masklet, uhel ar skerb, lunedoù du : gwir black block « o c’hortoz ar faskourien evit ober o stal ». Ar pezh zo e oant… 4 ! Pevar leue o redek digizet e du penn-kil ha troad e-touez tud gwisket a bep liv.
• Hag e penn ar pardon e oa un den gwisket e… flamank roz. Warnañ skrivet « pep zo gallus » (?!). Perak ? N’am eus ket komprenet.

En holl, ne soñj ket din e oa muioc’h eget 10 gwenn-ha-du e degouezh ar Redadeg. Evel e forzh peseurt manifestadeg, sonadeg pe me oar. Memes e Vierzon pe Aix-les-Bains on sur e vo gwelet etre pemp ha dek gwenn-ha-du ma vez aozet ur marathon pe ur redadeg bennak gant 100-200 sportour o c’haloupat ennañ.

Setu ar pezh o deus gwelet tud eus Naoned ar sadorn-mañ o tremen dre straedoù o c’hêr. Ne soñj ket din e vefe bet komprenet gant ar c’hard eus an hanter e oa ur vanifestadeg evit ar brezhoneg hag evit Breizh ar Redadeg.

Ha geo, un dra all : er Redadeg e oa 99,99% a vegoù gwenn. E « kêriadenn ar Redadeg » e kreiz Naoned em eus gwelet… ale… pevar den du, d’ar muiañ tout, daou vugel en o zouez. Donemat dezhe !

Enep-faskour hag eus an tu-kleiz eo an Emsav met evel e-barzh emvodoù foran ha diabarzh LFI, n’eus ket nemet tud gwenn o kemer perzh en e vanifestadegoù. Sur on ez eus muioc’h a « rasizet » en ur vanifestadeg aozet gant an Rassemblement National.

Ha neuze kamaladed penaos ‘mañ kont gant « kengej ar stourmoù » ?

[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.

Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.