Labourat evit kêr Vrest evel touller-bezioù ne oa ket a-walc’h evit Mehdi, 35 vloaz. Ha, dreist-holl, ne oa ket a-walc’h evit bevañ evel ur julod, seurt ar re a welled gwechall o paboriñ e Bro-Leon.
D’an 29 a viz eost 2022 e voe serret e post gwir-treizh Bignon, e Liger-Atlantel. Ouzh stur ur BMW e oa ha 75kg a gannab a oa er c’houfr. Dao ! D’ar bidouf !
N’eo ket ar wech kentañ evitañ. Teir gwech e oa bet kondaonet dija, evit bezañ “gwennaet” sammadoù arc’hant gounezet diwar an trafikañ dramm.
Goulennet en deus bezañ laosket da vont a-raok e brosez. Siwazh dezhañ en deus aon al lez-varn e skampfe kuit en ur vro all kerkent ha dibrizonet. Chom a raio en toull-bac’h ha barnet e vo evit trafikañ dramm ha n’eo ket evit bezañ bet ur vulez nemetken.
[cc] Breizh-info.com, 2023, dépêches libres de copie et de diffusion sous réserve de mention et de lien vers la source d’origine
