Pempoul e Bro-Oueloù… Gwechall e oa tomm an traoù a-wechoù e karter ar porzh gant ar varteloded o doa tapet ur friad met bremañ eo deuet ar gêr da vezañ ur seurt adlec’h eus ar bannlevioù parizian !
E miz eost 2023 emañ daou grennard o tebriñ er McDo. Pemzek bloaz eo an hini yaouankañ. Un den a 23 bloaz az a da gaout anezho. Hag ober biz d’unan anezho ! Gourc’hemenn a ra dezhañ d’e heuliañ betek ur c’harr-tan hag a zo parket un tamm pelloc’h. Ennañ, daou gomper. An tri a zo arruet eus Paris, eus ar Seine Saint-Denis, kement ha bezañ rezis. Kondaonet eo bet ar leader meur a wech dija (evit houlierezh hag evit bezañ lakaet ur vinourez da sklavez). Ur sapre abostol eo ! Dindan evezh barnerezhel e oa d’ar mare-se (ha ne zeuet ket mui da sinañ), forzh penaos…
Un afer dramm eo ar wech-mañ. Amprestet en deus ar c’hrennard dramm digant ar paotr ha n’en deus ket restaolet anezhañ a-walc’h kar butunet en deus ul lodenn eus ar pakad. E-barzh metoù an drafikourion eo seurt c’hoari teurt ur pec’hed bras !
Mont a ra ar c’harread da di ar vamm evit bezañ restaolet ganti. N’emañ ket er gêr. Ha dao ! War-du ti an tad. War an hent e vo roet fest ar vazh d’ar c’hrennard. Gloazet eo. Ya met ur wech arruet e ti an tad ne vo ket ar memes c’hoari evit ar barizianed : n’eo ket eñ ur sac’h goullo an tad ! Daoust d’ar c’hourdrouzioù a vez graet outañ e rebarb ouzh ar skipailh trafikourion. Hag int kuit, spontet !
A-benn ar fin e vo galvet an archerien gant an tad ha kavet paotr an 9-3 e Pontrev, e-barzh ranndi un « eks ». Kar merc’hed zo a zo sot a-walc’h evit mont gant seurt c’hwilhed !
Kaset dirak al lez-varn ar sizhun dremenet e nac’has reiñ anv e gomperien. N’eo ket strikt : daoust d’e roll lez-varn ha d’e brofil eo bet kondaonet da 12 mizvezh toull-bac’h gant goursez ! Deboner ar justis e Bro-C’hall !…
Crédit photo : DR
[cc] Breizh-info.com, 2024, dépêches libres de copie et de diffusion sous réserve de mention et de lien vers la source d’origine
