Murielle Lepvraud (kannadez LFI 22) dilennadegour gwellañ an RN

Atav ar memes gerioù « bezit war evezh », « diwallit », « ar faskouriezh o tont en-dro ».

Met bremañ seurt komzoù a son goullo. Dreist-holl war ar maez !

Murielle Lepvraud, ar gannadez LFI eus bro Gwengamp a fell dezhi c’hoari ar c’homiser politik e-barzh ar votadeg a vo d’ar 7 a viz even a zeu e Pont-Melve.

Kar e Pont-Melve (Bro Dreger) ne oa hini ebet war ar renk er votadegoù diwezhañ, re miz meurzh. Teir listenn a zo bet savet etretant ha votadegoù-kêr a vo d’ar 7 ha 14 a viz even. Ur gannadez « normal » he defe lavaret e oa un dra vat evit ar spered demokratel hag he defe lavaret « chañs vat » d’al listennoù. Met Muriel Lepvraud a zo eus LFI hag LFI n’eo ket ur strollad demokratek. Nag en diabarzh nag en diavaez.

E-barzh ur gemenadenn kaset war ar rouedadoù sokial hag adkignet gant Lepvraud, ur strollegezh anvet ONED (Observatoire National de l’Extrême-Droite) a gemenn d’ar voterien : ul listenn, hini « Pont-Melvez vivant » gant Bruno Maitre « a zo soutenet gant an RN ». Hag an ONED da genderc’hel gant he frezegenn gant komzoù iriennelour ha peremptour.

Ar pezh zo, n’on ket sur e servijo d’un dra bennak. N’eur ket mui er bloavezhioù 90, Muriel Lepvraud a gred ne vo ket votet evit al listenn-mañ ma vez diskuliet d’an dud eo soutenet gant an RN. Ar c’hontrol eo ! Ma vez gouvezet gant an dud ez eus ul listenn RN war ar renk e vo votet muioc’h eviti !

Setu disoc’hoù ar votadegoù Europa eus 2024 e Pont-Melve (tapadenn skramm « Le Monde »).

Ha setu hini tro gentañ ar votadegoù-kannad diwezhañ (tapadenn skramm « Le Monde ») :

Ha Muriel Lepvraud a gred ez eo un diaezamant da vezañ soutenet gant an RN er votadegoù-kêr Pont-Melve ?

Efed klogorenn, dallentez, spered gaochist, an tu-kleiz a zo en ur bed all. An tu-kleiz eo dilennadegour gwellañ an RN.