Yvan Le Bolloc’h, pimpatrom Bretoned Paris ? [L’Agora]

Serr da veg Yvan Le Bolloc’h ! Roit peoc’h ! Abaoe pell m’out aet kuit eus Breizh. Abaoe pell out deuet da vezañ ur bobo eus Paris. N’out ket Breizhad ken. Bremañ, te zo kentoc’h an hini a c’hoario « ar Breizhad » er « predoù ‘ba kêr » pe war al leurennoù skinwell. Met arabat dekoniñ, n’out ket ur Breizhad ken.

Daou zoare a Vretoned Paris a zo : ar re a chom e Paris e-pad ur pennadig a-raok distreiñ da Vreizh. A-raok bezañ labezet gant spered Paris. Hag ar re a chom e Paris kar o buhez a zo e Paris. Darn anezhe a zo bet ganet e Paris, o zadoù kozh a zo eus Paris ivez. Met ur vamm-gozh bennak dezhe a zo eus Breizh ha, dre homañ, en em sentout a reont « Breizhad ».

Met ur Breizhad a goll e « Vreizhadelezh » ma chom re bell eus Breizh e-pad re a amzer. Kenderc’hel a ra Breizh da dreiñ hag eñ e well ket ar cheñchamantoù, mat pe fall, a c’hoarvez du-mañ.

Skuizh on o klevet Bretoned a-orin -o chom e Paris abaoe marc’had nav bloaz pe a-viskoazh evit darn- o tont e ti Mamm-gozh ur sizhunvezh bep hañv hag oc’h ober prezegennoù deomp. N’out ket Breizhad ken paotr ! Da dad, da vamm, da vamm-gozh, da eskern a oa Breizad, met te n’out ket. Te zo deuet da vezañ ur Parizian. Penn kil ha troad. Da vuhez pemdeziek zo e Paris. Da bloblemoù pemdeziek zo problemoù tud Paris. Da c’henoù a zo breizhad, da orin a zo eus Breizh, met te n’out ket ur Breizhad ken. Da spered a zo eus Paris. Da zoare da gomz a zo eus Paris. Da bouez-mouezh. Ha da zoare da wel Breizh a zo « skornet ». N’eo ket ar wirionez ken.

Ha gwasoc’h zo gant « Bretoned Paris » c’hoazh : darn a ra o demeurañs e Breizh, evit ar re c’hanet diwar Bretoned Paris, en ur vro ha ne anavezont ket. En ur vro m’o deus ur soñj « alaouret » anezhi, « fantasmet ». Breizh o zadoù kozh ha n’eo ket hini a-vremañ. Breizh ar vakañsoù-hañv ha n’eo ket Breizh ar goañv. Yvan Le Bolloc’h a zo bet ganet e Breizh met aet eo kuit abaoe 40 bloaz bremañ ! Petra a gompren eus Breizh a-vremañ ? Krediñ a ra c’hoazh eo Breizh un « douar enep-faskour » dre natur evel e bloavezhioù 90 ha 2000 tra ma vez en e uhelañ an RN e meur a gumun. Yvan Le Bolloc’h a gred ez eus kêriadennoù e Breizh evel Pluveleg m’o deus biskoazh gwelet enbroidi an dud o chom enne. Bez ez eus eus seurt kêriadennoù e Breizh a-vremañ, lârit din ?

N’eo ket ur pec’hed da vezañ ur « Breton eus Paris » met arabat mont re bell ganti tudoù ! Pe c’hwi a zistro da Vreizh un deiz bennak hag e choazit da vevañ evel ma vev ar Vretoned pe e tavit war Breizh ! Yvan Le Bolloc’h a zo unan eus ar re ziwezhañ-mañ. Neuze, serr da c’henoù, Yvan ar Parizian, ar bobo.

Job an Tregeriad

Crédit photo : DR (photo d’illustration)
[cc] Breizh-info.com, 2025, dépêches libres de copie et de diffusion sous réserve de mention et de lien vers la source d’origine