E Boulvriag (Bro Dreger), war war blasenn an iliz, e oa lid « Disprizoù ar brezhoneg » disadorn tremenet gant Ai’ta. Deuet e oa un nebeut emsaverien gwisket e orañjez (ne oant ket niverus siwazh, a-boan un ugent bennak ha bras ar blasenn) da sellet ouzh an abadenn.
Setu roll ar re enoret :
Rummad panellerezh :
– 1añ priz : Bulad-Pestivien (22), bet nevesaet ganto panelloù ar gumun hep an disterañ ger e brezhoneg
– 2l priz : an Arvor-Baden (56), lec’h m’eo aet diwar-wel un toullad anvioù-lec’h e brezhoneg
– 3vet priz : festival En Arwen e Klegereg (56), ma n’eus ger ebet e brezhoneg war ar panelloù er gouel na war o lec’hienn internet
– Priz ispisial ar c’hwitadenn vravañ : Lokorn (29) evit bezañ troet e brezhoneg ar panelloù gant an naouegezh artifisiel, fazioù e-leizh
Rummad mediaoù :
– 1añ priz : Ici Breizh Izel, evit an digresk abadennoù e brezhoneg, dreist-holl ar prantadoù keleier
– 2l priz : Frañs 3 Breizh, a gav abeg eus kement darvoud evit nullañ pe cheñch eur skignañ Bali-Breizh, o abadenn bennañ e brezhoneg
– 3vet priz : Abadenn C Jamy, evit ar rann diwar-benn Breizh gant ur sell parizian ha klichedoù diwar-benn ar brezhoneg
Rummad Deskadurezh :
– 1añ priz : Claudine Guillou, bet maerez Boulvriag, hag he c’humun, evit bezañ lezet da serriñ ar skol Diwan
– 2l priz : Departamant Aodoù-an-Arvor, evit an diouer a harp da raktres skolaj Diwan e Perroz hag evit lezel da vreiñ skolaj Diwan Plijidi
– 3vet priz : Ensellerezh ar Stad e Breizh, evit al labour tenn kaset da benn evit serriñ klasadoù divyezh, daoust d’ar pal 30 000 bugel en hentennoù divyezhek ac’hann 2027.
Priz ispisial Benjamin Morel : Jean-Michel Blanquer, bet ministr an Deskadurezh, evit e gomzoù dismegañsus a-enep ar yezhoù minorelaet hag ar brezhoneg
Priz meur Divrezhoneger ar bloaz (rampo) : Pierre-Yves Thomas ha Julie Dénès, dilennet e ti-kêr Karaez (29). An hini gentañ en deus graet trouz d’ur guzulierez-kêr a gomze e brezhoneg, hag eben a c’houlenn ma vo dalc’het e galleg emvodoù ar bodad tra-kêr diwar-benn an divyezhegezh.
Abaoe pevar bloaz e oa Ai’ta o kousket, gant ar spi e vo adlañset ar strollad da vat ar wezh-mañ. Gant emsaverien nevez matreze ?
[cc] Article rédigé par la rédaction de breizh-info.com et relu et corrigé (orthographe, syntaxe) par une intelligence artificielle.
Breizh-info.com, 2026, dépêches libres de copie et de diffusion sous réserve de mention obligatoire et de lien do follow vers la source d’origine.
2 réponses à “Ai’ta en deus roet « Disprizioù ar Brezhoneg »”
Unan a vefe mat reiñ da SBB ivez evit live truezus ar brezhoneg implijet ganto. Mezh a reomp d’ar gwir Vrezhoned.
« Mezh a REONT » oa da skrivañ emichañs.
Kontrol deoc’h e kav din ez eo gwelloc’h brezhoneg fall (c’hwi ivez a ra fazioù) eget galleg pe ur parlant a Vreizh uhel.
Tamm ha tamm e wellaint.